Амма улууһугар Солобуода уйгулаах туоната киэҥ «Муона чараҥар» ахсыс төгүлүн ыытыллар ыраах айан суоппардарын өрөспүүбүлүкэтээҕи сүлүөтүн кыттыылаахтарын нөрүөн нөргүйэ көрүстэ. Силбиктээх субуота күн манна күүрээннээх күрэхтэр оройуттан тутулуннулар, бастыҥ үлэһиттэр бэлиэтэннилэр.
Саха сиригэр ыраах айан суоппардарын ыһыаҕа аан бастаан 2008 сыллаахха Таатта ытык сиригэр ыһыллыбыта. Онтон ылата суоппардар көрсүһэр түһүлгэлэр Уус Алдаҥҥа, Мэҥэ Хаҥаласка, Чурапчыга, Дьокуускайга, Намҥа түстэммиттэрэ. Быйылгы сүлүөккэ ыраах-чугас 10 улуустан 400-чэкэ кыттааччы муһуннулар. Алгыстаах Амма ыалдьыттарын быйыл СӨ суол хаһаайыстыбатын уонна тырааныспарын миниистирэ Владимир Сивцев, Амма улууһун баһылыга Степан Кузьмин, Амма нэһилиэгин баһылыга Михаил Артемьев, ыраах айан суоппардарын өрөспүүбүлүкэтээҕи түмсүүлэрин бэрэссэдээтэлэ Николай Мочкин, Амма улууһун суоппардарын ассоциациятын бэрэссэдээтэлэ Николай Акимов эҕэрдэлээтилэр, сыралаах, олоҕу-дьаһаҕы хааччыйыыга оҥорор үлэлэрин иһин махтанан туран наҕараадалары туттардылар.
Бу күн СӨ автомобильнай тырааныспарын бочуоттаах үлэһиттэрин аатын Амматааҕы оҕо искусствотын оскуолатын суоппара Леонид Саввин, Амма 1 №-дээх оскуолатын суоппара Владимир Куприянов, Амматааҕы лиссиэй суоппара Христофор Слепцов, Бөтүҥ нэһилиэгин урбаанньыта Степан Федоров, Мэҥэ Хаҥаластан Иван Лыткин, Антон Максимов сүктүлэр. СӨ суол хаһаайыстыбатын уонна тырааныспарын министиэристибэтин Махталынан Гаврил Шестаков, Ян Новгородов, Трофим Свинобоев, Альберт Стручков бэлиэтэннилэр. Министиэристибэ Бочуоттаах грамотатын урбаанньыт Роман Макаров тутта. Амма улууһун баһылыгыттан улуус дьаһалтатын Махтал суругунан Николай Мочкин, ыраах айан суоппардарын өрөспүүбүлүкэтээҕи түмсүүлэрин бэрэссэдээтэлин солбуйааччы Николай Пономарев, Николай Акимов наҕараадаланнылар. Оттон Амма нэһилиэгин бочуоттаах олохтооҕун аатын Петр Захаров сүктэ.
Тоһуттар тымныыны, өҥүрүк куйааһы аахсыбакка массыына уруулун эрэллээхтик эрийэр, суол моһоллорун эрдээхтик туоруур суоппар эр бэртэрин «Муона чараҥа» уйаннарын-хатаннарын спортивнай күрэхтэргэ тургутта.Сэттэлии кыттааччылаах алта хамаанда эстафетаҕа, биирдиилээн бастыыр иһин мас тардыһыытыгар, хапсаҕайга, 60 саастарыттан үөһэ саастаахтар 60 миэтэрэни сүүрүүгэ, сахалыы таҥаска, ырыаҕа күрэхтэһэн умнуллубат күнү атаардылар.