Москубаҕа, кулун тутар 4-5 күннэригэр Арассыыйа бааһынай хаһаайыстыбаларын уонна кэпэрэтииптэрин сойууһун ассоциациятын сийиэһэ буолан ааста. АККОР тэриллибитэ 35 сылыгар анаммыт бу улахан сийиэскэ дойду бары эрэгийиэннэриттэн 850 дэлэгээт түмсэн, дойду экэниэмикэтин сайыннарыыга пиэрмэрдэр уонна кэпэрэтииптэр хамсааһыннарын суолтатын, дойдуга ас-үөл өттүнэн куттал суох буолуутун хааччыйыы, тыа сирин кэлимник сайыннарыы уо.д.а. тустарынан кэпсэттилэр.
Саха Сирин дэлэгээссийэтин чилиэннэрэ сийиэскэ көхтөөхтүк үлэлээтилэр, өрөспүүбүлүкэ тыатын хаһаайыстыбатын үлэтин-хамнаһын сырдаттылар, үбүлээһин ырычааҕын, боломуочуйа улуустарга бэриллиитин, АПК үлэһиттэрин санаторий-куруорт путевкаларынан хааччыйыы тустарынан билиһинэрдилэр, көрсүһүүлэргэ сырыттылар, боччумнаах кэпсэтиилэри ыыттылар. АККОР наҕараадаларынан Александр Артемьев, Василий Тимофеев, Анна-Мария Трифонова, Наталья Ноговицына, Федот Семенов, Ньургун Габышев, Судаарыстыбаннай Дуума Махтал суруктарынан Андрей Левин, Мотрена Иванова, Федерация Сэбиэтин Махтал суруктарынан Петр Протопопов, Эдуард Варламов бэлиэтэннилэр. Анал байыаннай дьайыыга сылдьар буойуттарга көмөнү тэрийиигэ үлэлиир пиэрмэрдэр сыралара сиэрдээхтик сыаналанна, Судаарыстыбаннай Дуума оборуонаҕа кэмитиэтин Грамотата Вера Лихановаҕа туттарылынна.
Ол туһунан Вера Петровна маннык кэпсээтэ:
– Быйылгы үбүлүөйүнэй сийиэскэ АККОР Саха Өрөспүүбүлүкэтээҕи салаатын бэрэсидьиэнэ Александр Артемьев салалтатынан 30 буолан сырыттыбыт. Дэлэгээссийэ састаабыгар АККОР улуустардааҕы салааларын бэрэссэдээтэллэрэ, бааһынай хаһаайыстыбалар баһылыктара, тыа хаһаайыстыбатын кэпэрэтииптэрин салайааччылара бааллар. Биһиги, Зарема Романовна, Лена Николаевна уонна мин, үһүө буоламмыт, Тыа сирин дьахталларын кэмпириэнсийэтигэр кытынныбыт. Ким тугу үлэлиирин туһунан кэпсээтибит, мин миэстэҕэ үлэни-хамнаһы тэрийэн, нэһилиэнньэ дохуотун үрдэтиигэ бэйэм көрүүлэрбин үллэһинним. Ону сэҥээрэннэр, Резолюцияҕа киллэрдилэр.
Сийиэскэ соһуччу баҕайытык Судаарыстыбаннай Дуума оборуонаҕа кэмитиэтин бэрэссэдээтэлэ генерал-полковник Андрей Картополов илии баттааһыннаах Грамотатын туттараннар долгуттулар да, үөртүлэр да. Маннык наҕарааданы элбэх киһи туппута эрээри, мин дьахталлартан соҕотох этим. Анал байыаннай дьайыы саҕаланыаҕыттан «Лиханова пиэрмэтин» оҥорор таһаарар бородууксуйата элбэх төгүл барда.
Сийиэс кэнниттэн Москуба таһынааҕы хаһаайыстыбалар үлэлэрин билсэр үгэс баар, ааспыт сылларга Тулаҕа, Ивановоҕа сылдьыбыппыт. Быйыл дэлэгээссийэҕэ элбэх сылгыһыт баарын учуоттаан, Рязань куоракка тахса сырыттыбыт, Бүтүн Арассыыйатааҕы Сылгы иитиитин научнай-чинчийэр үнүстүүтүн үлэтин-хамнаһын билистибит, лабораторияларыгар анаалыс ханнык көрүҥнэрин оҥороллорун кэпсээтилэр. Мин бэйэм хаһаайыстыбам оҥорон таһаарар бородуксуйатыттан убаһа этин кэһии гынан илдьэн биэрбитим, ону сэҥээрэннэр, бииргэ үлэлэһэр туһунан этии тутан олоробун.
Ыспыраапка: Вера Лиханова СГТХА-ны бүтэрэн, аҕыс сыл технологтаабыта, салгыы кэтэхтэн экэнэмиис үөрэҕин бүтэрэн, бааҥҥа үлэлээбитэ, онтон «Лиханова пиэрмэтэ» диэн бааһынай хаһаайыстыбатын тэринэн, сылгы иитэр уонна сир аһынан дьарыктанар. Анал байыаннай дьайыыга сылдьар байыастарга дойду амтаннаах, ахтылҕаннаах аһын нобуорун оҥорон ыытар.
Сийиэс туһунан сиһилии «Ил Түмэн» хаһыат кэлэр нүөмэригэр ааҕыаххыт
Хаартыскалары Вера Лиханова хааччыйда