Самозанятай Людмила Егорова умсугуйан дьарыктанар валяние ньыматынан оҥоһуллубут араас дьэрэкээн оҥоһуктара кэрэ аҥар кэрэхсэбилин ылыан ылаллар.
Людмила Егорова элбэх күрэх уонна быыстапка ситиһиилээх кыттыылааҕынан буолар. Үөһээ Бүлүү улууһун Үөдүгэй нэһилиэгин сынньанар киинигэр бу өрөбүллэргэ валяние ньыматынан илии оҥоһугар маастар кылаас ыытта. Людмила балтын Анастасияны кытары бини диэн мадьыаллаах бэргэһэни түүнэн уонна вискозанан оҥорон көрдөрдүлэр. Маастар кылааска элбэх киһи кытынна. Илэ харахтарынан көрөн, тутан-хабан, боруобалаан, саҥа билиилээх астынан тарҕастылар.
Ону тэҥэ сынньанар киин сыанатыгар Людмила оҥоһуктарын көрдөрөр дефиле буолла. Валяние ньыматынан араас былааччыйа, былаат, сон, атах таҥаһа даҕаны оҥоруохха сөп эбит.
Билиҥҥи кэмҥэ Людмила уонна Анастасия Егоровалар Санкт-Петербург куоракка сэтинньи ыйга буолар быыстапкаҕа кыттаары бэлэмнэнэ сылдьаллар. Инникитин даҕаны Үөһээ Бүлүүнү уонна Саха Сирин үрдүктүк ааттата сылдьаргар, ситиһиини баҕарабыт.
