Алтынньы 30 күнүттэн сэтинньи 7 күнүгэр диэри биллэриллибит өрөбүллэр ыарыы тарҕамматыгар туһуланаллар.
Ону улуус урбаанньыттара хайдах ылыммыттарын «Мой бизнес» киин судаарыстыбаннай автономнай тэрилтэтин Сунтаар улууһугар сэбиэдиссэйэ Агафья Антоновна Прокопьеваттан ыйыталастыбыт.
— Улууспут урбаанньыттара Ил Дархан уһун өрөбүллэри биллэрбитин сүрүннээн өйүүллэр диэххэ сөп. Биллэн турар урбаан эйгэтигэр бу улахан охсуулаах да буоллар киһиэхэ саамай күндүтэ доруобуйата буоллаҕа. Бу коронавирус туруоҕуттан бары эйгэҕэ аҕалбыт уустуктара да элбэх. Ону бэркэ диэн бары билинэбит, өйдүүбүт. Ыарыы төһөнөн эрдэ тохтуур, оччонон үлэлэрэ таһаарыылаах буолар.
Сарсын Урбаан, туризм дьыалаларыгар министерствота урбаанньыттарга күнүс 4 чааска сэминээр — видеоконференция тэрийиэҕэ. Онно бу пандемия кэмигэр урбаанньыттарга туох, ханнык көмө оҥоһуллуоҕун туһунан сиһилии кэпсэтиэхтээхпит.