Амма нэһилиэгин култуура уонна сынньалаҥ паркатыгар нэдиэлэ устата ыытыллыбыт Арассыыйа урбаанньыттарын күнүгэр анаммыт тэрээһиннэри түмүктүүр “Бизнес пикник” бэрт сэргэхтик буолан ааста. Бу түмсүүгэ улуус көхтөөх урбаанньыттара, урбаан эйгэтигэр үлэлиир дьон, күөх сайыны көрсө дуоһуйа сынньанан, үөрэн –көтөн тарҕастылар.
Урбаанньыттары улуус дьокутааттарын Сэбиэтин бэрэсэдээтэлэ Владимир Колосов, СӨ “Мин биисинэһим” киин Амма улууһун салаатын бэрэстэбиитэлэ Александра Николаева, “Биисинэс- инкубатор” дириэктэрэ Николай Афанасьев эҕэрдэлээтилэр уонна көхтөөх, өр сылларга үлэлээбит урбаанньыттары бэлиэтээн наҕараадалары туттартаатылар. Маны сэргэ урбаанньыттарга Амма улууһун нэһилиэнньэ социальнай көмүскэлин биир кэлим киинин исписэлииһэ Сайаана Сергиенко куруутун күүс-көмө буолар урбаанньыттарга Махтал суруктары туттарда.
“Тэрээһиммит саҕаланыаҕыттан ыла олус үтүө, истиҥ эйгэ үөскээтэ. Бу күн араас күрэхтэһиилэр, ырыа-тойук, үҥкүү, маастар-кылаастар буоллулар. Эдэр урбаанньыттар, уопуттаах дьон да тэҥҥэ кэлэн, дьоһуннук кэпсэтэн-ипсэтэн, билсэн-көрсөн астыннылар. Манна даҕатан эттэххэ, эргиэн дьиэтин салайааччыта Наталья Ивановна Шишигина бу күн өр сыл үлэлээбит үс үлэһитигэр Кытайга сынньана барар путевка бэлэхтээбитэ олус долгутуулаах буолла.
Тэрээһиҥҥэ араас маастар-кылаастар ыытыллыбыттара олус диэн кэрэхсэбиллээх буолбутун бэлиэтээтилэр. Кыттыылаахтар бары түмсүүлээх буолуу, биир санааланыы үөрүүтүн биллилэр. Араас көлүөнэ дьон бииргэ мустан, үтүө түгэннэри үллэһиннилэр. Бу тэрээһин олоххо күүс-уох биэрэр, саҥа үрдэллэргэ дьулууру тосхойор. Үтүө тыыннаах, сэргэх, кэрэ түгэннэр баар буола турдуннар. Бары кэлэн кыттыбыт урбаанньыттарбытыгар махтал тылларын тириэрдэбит.
Ону сэргэ Николай Пухов дириэктэрдээх Амматааҕы норуот айымньытын бары үлэһиттэригэр, алгысчыт Василий Кочаткиҥҥа, күрэхтэрбитигэр спонсордаабыт биир идэлээхтэрбитигэр Кирилл Боярскайга, Сарвиноз Васильеваҕа, Алексей Илларионовка уонна бириистэри олохтообут Нина Афанасьеваҕа барҕа махтал буоллун. Минньигэс шашлык, плов буһаран күндүлээбит бэйэ дьарыктаах Алексей Иванову, минньигэс торттаах Людмила Сутакованы бэлиэтиибит”,- диэн СӨ “Мин биисинэһим” киини Амма улууһугар салаатын бэрэстэбиитэлэр Александра Николаева сырдатар.
Бу күн маастар-кылаастары, ол курдук ох саанан ытыыга СЮТ дириэктэрэ Николай Николаев, чэй церемониятын көрдөрбүт СЮН педагога, бэйэ дьарыктаах Александра Киренская, айылҕаттан талааннаах, “Биисинэс-инкубатор” резиденэ Анна Килбясова — Айылҕаана Оһуордаах ыытан дьон интэриэһин тартылар.
“Урбаанньыт күнэ үрдүк тэрээһиннээхтик ааста диэн бэлиэтиибит. Сылаалаах үлэҕититтэн сынньаныҥ диэбит курдук, күммүт чаҕылыйан, олус үчүгэй күн буолла. Тэрээһиммит алгыстан саҕаланна, эҕэрдэ үҥкүү үҥкүүлэннэ, ылбаҕай ырыа ылланна. Маны бэлэхтээбит култуурабыт үлэһиттэригэр улахан махтал! Биһиги үлэбит,ситиһиибит тутаах үлэһиттэрин сыаналаан, үрдүк наҕараада туттарбыттарыттан үөрдүбүт уонна махтал тылларын тиэрдэбит. Билсиһии,эҕэрдэ ырыалаах -тойуктаах, остуол тула олорон үлэ-хамнас туһунан истиҥ кэпсэтии буолла. Остуолбутун иилээн саҕалаан Саргылаана Шестакова ыыппытыгар эмиэ туспа махтал. Минньигэстик аһаан, дуоһуйа кэпсэтэн баран араас оонньуулар буоллулар. Ол курдук оҕунан ытыы, дартс оонньуу, сыал ытыыта, хабылык- хаамыска, бэһиэлэй эстафета бука барыбытын түмтэ. Олус үчүгэй маастар кылаастар буоллулар. Онон ис дууһаларын ууран туран, бу күнү бэлэхтээбит биһиги салайааччыларбытыгар Александра Михайловнаҕа, Николай Афанасьевичка, Ольга Михайловнаҕа, минньигэс астаах повардарга уонна бу тэрэһииҥҥэ кыттыбыт дьоннорбутугар улахан махталбытын биллэрэбит! Үлэҕит өссө үрдук ситиһиилээх буоллун!”, — диэн «Камелот» эргиэн дьиэтин кэлэктиибэ тириэрдэр.