Нам улууһугар тимири уһаарыы сөргүтүллүбүтэ 15 сылыгар аналлаах өрөспүүбүлүкэтээҕи «УОТТААХ ТИМИР» тэрээһин уот иччитигэр сүгүрүйүү алгыһын сиэриттэн-туомуттан саҕаланна.
Бүгүн икки оһоххо тимири уһаарыахтара, өрөспүүбүлүкэтээҕи норуот айымньытын дьиэтин үлэһиттэрэ саха сүөһүтүн идэһэҕэ туттуутун сиэрин-туомун ыытыахтара, Нам, Үөһээ-Бүлүү Чап уонна Бүлүү тимир уустарын булаат буһарыытыгар, Мэҥэ Хаҥалас уонна Горнай улуустарын тар оҥоруутугар маастар-кылаастары ыытыахтара, Таастаах нэһилиэнньэтэ культурнай уонна спортивнай тэрээһиннэри тэрийиэхтэрэ. Саха сүөһүтүн этиттэн хорчуопка, туой иһиккэ күөс өрүү буолуоҕа. «Бастыҥ бадаайы» күрэххэ холонуохтара.
2011 сыл сайыныгар Таастаах нэһилиэгэр Намнааҕы музей уонна краевед Герасимов Василий Иванович көҕүлээһиннэринэн аан бастаан тимири уһаарыы ыытыллыбыт. Манна Намнааҕы техническэй Дьиэ, “Эхо” лааҕыр оҕолоро, Дүлүҥ Уус сыдьааннара Жирковтар, I-Хомустаах, Таастаах, Партизан нэһилиэктэрин олохтоохторо кыттыыны ылбыттар. Былыргы тимири уһаарыы ньыматынан киэһэ биэс чаастан саҕалаан сарсыарда биэс чаас саҕана 50 киилэ таастан 14 киилэ болгуону таһаарбыттар, тутатына олохтоох уустар быһах охсон таһаарбыттар.
 
Источник: газета Энсиэли