Элбэх оҕолоох дьиэ кэргэн — урбаанньыт Николай уонна Анастасия Кайдаловтар быстах хомуурга барбыт Абаҕа нэһилиэгин уолаттарын дьиэ кэргэттэригэр бородуукта набора кэһиилээх тиийэн кэллилэр.
Николай Спартакович уонна Анастасия Валерьевна Амматтан уонна Дьокуускай куорат военкоматтарыттан ыҥырыллыбыт Абаҕаттан төрүттээх уолаттарбыт дьонугар соһуччу үөрүүнү бэлэхтээн долгуттулар.
Үтүө санаалаах Кайдаловтар бэйэлэрин 5 оҕолорун сэргэ 5 оҕону иитэ ылан улахан дьиэ кэргэн буолан үлэ үөһүгэр сылдьар дьон. Баҕа өттүлэринэн аһымал акцияларга мэлдьи кытталлар, дьон-сэргэ махталын ылаллар.
—Быстах хомуурга барбыт саллааттар чугас дьонноругар «Биһи бииргэбит, уолаттар этэҥҥэ дойдуларыгар эргиллэн кэлиэхтэрэ» диэн ис сүрэхтэн оҥоһуллубут сэмэй көмөбүт кинилэр санааларын көтөҕүө, эрчим эбиэ диэн эрэнэбит. Кинилэр соҕотох буолбатахтарын, өйөбүл буолар дьон чугас баалларын билиэхтээхтэр— диэн Анастасия Валерьевна санаатын үллэстэр.
