Новости
Улууска сыана үрдээһинэ хайдах хонтуруолланарый?
25 марта 2022

СӨ Сыанаҕа бэлиитикэтин судаарыстыбаннай кэмитиэтэ бу күннэргэ киин тэлэбиидэнньэнэн, интэриниэт ситимнэринэн өрөспүүбүлүкэ үрдүнэн сыана үрдээһинин уонна бородууктаны, табаары тиэйэн аҕалыы туһунан нэһилиэнньэҕэ сырдатар, быһаарар иһитиннэриилэри оҥордо. Билигин өрөспүүбүлүкэ үрдүнэн хас улуус аайы сыана үрдээһинин нэдиэлэ ахсын кэтээн көрөн мониторинг олохтонно. Улууспутугар Саха Өрөспүүбүлүкэтин тарыыпка (тариф) агенствотын салаатын сүрүннүүр эксперэ, сыананы хонтуруоллуур салаа эппиэттээх үлэһитинэн анаммыт Ольга Михайловна Потапованы кытары кэпсэтэн, биһиэхэ билиҥҥи туругунан ханнык бородуукталарга сыана үрдээбитин ыйыталастыбыт.

— Бу кэккэ кэмҥэ үөскээбит балаһыанньанан, өрөспүүбүлүкэ үрдүнэн сыана үрдээһинин, урукку өттүгэр ый аайы кэтээн көрөр буоллахпытына, билигин нэдиэлэҕэ иккитэ кэтээн көрөбүт. Улуус аайы тус-туһунан олоххо-дьаһахха бастакы суолталаах бородууктаҕа уонна табаарга испииһэк оҥоһуллар. Биһиэхэ испииһэккэ барыта 21 бастакы суолталаах бородуукта уонна табаар киирэр, ол иһигэр фрукта, оҕуруот аһа, 92-лээх бензин, дизель уматыга. Күн бүгүн улуус маҕаһыыннарыгар бородууктаҕа сыана 15 бырыһыаҥҥа тиийэ үрдээбитэ бэлиэтэнэр. Ол курдук, саахарга, мас арыытыгар, дьаабылыкаҕа, хаппыыстаҕа, моркуопка, оҕо аһылыгар.

Сыана үрдээһинэ кууһунан атыылыыр базалартан, кинилэр поставщиктарыттан, тиэйэн аҕалыыттан тутулуктааҕа биллэр. Маныаха чааһынай урбаанньыттар олохтоммут надбавканы таһынан сыананы үрдэтиэ суохтаахтар. Үөскээбит балаһыанньанан сибээстээн, өрөспүүбүлүкэ салалтата, туһааннаах министиэристибэлэр сыананы биир таһымҥа тутан хаалар туһугар анал дьаһаллары ылынан, урбаанньыттар үлэлэрэ эмиэ харгыстамматын туһугар үлэ барар. Оттон чааһынай дьон сыана олус үрдээбитин көрдөхтөрүнэ, СӨ Сыанаҕа бэлиитикэтин судаарыстыбаннай кэмитиэтин суһал нүөмэригэр — 8 (4112)50-80-26 эрийэн биллэрэр бырааптаахтар.

Сыана үрдээһинин чинчийэр үлэһиттэр инникитин улуус иһинээҕи маҕаһыыннары барыларын кэтээн көрөр уонна нэһилиэктэринэн тахсан, сыананы биир кэрдиискэ тутар туһугар үлэлэһиэхтэрэ.