Амма улууһун урбаанньыттара бары күргүөмүнэн тахсан экэнэмиистэр сквердарыгар сибэккилэри олортулар.
«Биһиги сотору кэминэн улууспутугар адаптивнай спорт көрүҥнэригэр ыытыллыахтаах спартакиадаҕа бэлэмнэнэн, спонсорстваҕа эрэ буолбакка, буолар субуотунньуктарга көхтөөхтүк кыттабыт. Ол курдук улуус сатабыллаахтара туора турбакка, Аммабыт ыалдьыттары көрсөрүгэр тупсаҕай көстүүлээх буоларыгар көмөлөһөн сибэкки олордуутугар көмөлөстүбүт, бэйэбит кылааппытын киллэрдибит. От ыйыгар ыытыллыахтаах тэрээһиҥҥэ, сайын да устата Аммаҕа элбэх ыалдьыт кэлэр. Онно улууспут киинигэр баар сквердэрбит кэрэ сибэккинэн киэргэнэллэригэр, уулуссаларбыт ыраас буолалларыгар бары кыһаллыахтаахпыт. Биһигини кытта сквергэ сибэкки олордуутугар «Сардаана» уһуйаан үлэһиттэрэ, социальнай управление исписэлиистэрэ тэҥҥэ үлэлэстилэр. Онон бары күргүөмүнэн сквергэ тупсарыы үлэтин ыыттыбыт», — диэн СӨ «Мин биисинэһим» киин Амма улууһугар салаатын салайааччыта Владимир Колосов сырдатта.
