Бороҕон нэһилиэгэр, чуолаан Тумул бөһүөлэгэр бүгүн дьол күнэ үүннэ. Тумуллар киэн туттар дьонноро Ивановтар дьиэ кэргэн дьоһуннаах бэлэҕи ууннулар. Ол курдук «Интехстрой» хампаанньалар бөлөхтөрүн төрүттээччи, тумуллар мааны күтүөттэрэ Николай Иванов көҕүлээһининэн «Интехстрой» уонна «МеталлКом» хампаанньалар бэйэлэрин үптэринэн спортивнай сааланы тутан бүгүн аана тэлэччи аһылынна.
Тэрээһиҥҥэ СӨ физическэй култуураҕа уонна спорка миниистирин бастакы солбуйааччы Гаврил Мохначевскай, Уус Алдан улууһун баһылыгын эбээһинэһин толорооччу Илья Артамонов уонна тутар тэрилтэлэр, нэһилиэк салайааччылара кытыннылар.
Баараҕай тутуу нэһилиэккэ спорт сайдыытыгар улахан өҥөлөөх ССРС, РСФСР, Саха АССР спордун маастара, Саха АССР үтүөлээх тренера Иннокентий Халдеев аатын сүктэ. Онон чөл, чэгиэн туругу көҕүлээбит чулуу киһи аата үйэлэргэ сураҕырыа.
Тэрээһиҥҥэ элбэх эҕэрдэ этилиннэ, наҕараадалааһын да баар буолла. Ол курдук улуус баһылыгын эбээһинэһин толорооччу Илья Артамонов тутууну көҕүлээбит дьоҥҥо Николай Ивановка Уус Алдан улууһун бочуоттаах олохтооҕо буолбутун туоһулуур дастабырыанньаны, бэлиэни, кини кэргэнигэр, тумуллар биир дойдулаахтарыгар Мария Прокопьеваҕа «Уус Алдан улууһун социальнай экономическай сайдыытыгар киллэрбит кылаатын иһин» бэлиэни туттарда.
Дьоро күнү СӨ народнай артыыһа Аскалон Павлов бэйэтин ырыаларынан киэргэттэ.