Бүгүн СӨ Предпринимательствоҕа уонна туризмҥа миниистирэ Тимур Ханды Амма улууһун сатабыллаахтарын кытта көрүстэ. Миниистир сатабыллаахтарга өрөспүүбүлүкэҕэ предпринимательство көрдөрүүтүн, нолуоктан киириини, туризмы сайыннарыы туһунан кэпсээтэ уонна боппуруостарга эппиэттээтэ. Көрсүһүүнү Амматааҕы “Биисинэс-инкубатор” уонна «Мин биисинэһим» киин тэрийэн ыыттылар.
Билигин дойду сатабыллаахтара суох кыайан сайдыбат. Ол холобурун бэйэбит да улууспутугар ылан көрдөххө, туох баар атыы-эргиэн, оҥоһуллар өҥө барыта кинилэр нөҥүө ыытыллар. Өскөтүн сатабыллаахтарбыт бэйэлэрин дьыалаларын тохтотон кэбиһэр түгэннэригэр, этэргэ диэри туох буолуон киһи этиэн куттанар. Онон даҕаны дойду салалтата бу эйгэҕэ ураты болҕомтотун уурар уонна куруутун кинилэри өйүүр. Ону миниистир Тимур Ханды бигэргэтэр. Кини Амма улууһугар сатабыллаахтары өйүүллэр, бары улуустарга оннук буолбатах, баһылыккыт барыгытын бииргэ тутан көмөнү оҥорорун бэлиэтиибин диэн эттэ. Кинилэр министиэристибэлэрэ улуустарынан урбаан хайдах сайдан иһэригэр ырытыы оҥорон көрбүтүн билиһиннэрдэ. Маныаха Амма улууһа биир бастыҥнар ахсааннарыгар сылдьар эбит. Ол курдук холобура 2041 киһи регистрацияланан урбаанынан дьарыктанар. Нолуокка да киллэрии куһаҕана суох. Холобура Амма улууһун сатабыллаахтара нолуокка 84,90 мөл. солк киллэрбиттэр. Улуус бу эйгэҕэ бэйэтин бюджетиттэн 10 мөл. солк көрбүт буоллаҕына, Үөһээ Бүлүү курдук улахан улуус 5 мөл.900 тыһ солк ороскуоттаабыт. Бэйэбит курдук нэһилиэнньэлээх Таатта улууһа бюджетиттэн 1 мөл. солк көрбүт.