Новости "Центра "Мой бизнес"
Тэрээһиннээх туризмы тэрийии – Амма урбаанньыттарын сүрүн соруктара
27 января 2023

Амма улууһугар урбаан эйгэтигэр саҥа үлэлээн саҕалыырга, сайдарга, кэҥииргэ кыах киэҥ. Онуоха улуус баһылыга Степан Кузьмин урбаанньыттары кытта көрсүһүүтүгэр элбэх холобуру аҕалла.

Урбаанньыттар – олоҕу-дьаһаҕы хааччыйыыга сүрүн тирэхпит буолаллар. Кинилэр үлэлэриттэн социальнай-экономическэй сайдыы быһаччы тулуктаах. Атыы-эргиэн, оҥорон таһаарыы, араас өрүттээх өҥөнү оҥоруу, аралдьытыы – киһи аймах баарын тухары сүппэт, сайдар эйгэ.

Урбаан эйгэтин сайдар саргытын торумнуур сыаллаах көрсүһүүгэ улуус баһылыга Степан Кузьмин, баһылык солбуйааччыта Иван Бураев, “Бизнес инкубатор” дириэктэрэ Евгений Афанасьев, “Мин биисинэһим” Киин салайааччыта Владимир Колосов, араас эйгэ урбаанньыттара кыттыыны ыланнар сүбэлэһии бэрээдэгинэн салгыы үлэни ыытар хайысхалары сүбэлэстилэр.

-Олохтоох туризмы сайыннарарга айылҕа анаан оҥорбут сиригэр олоробут эрээри, бу үлэни сүнньүн буллара, тэрээһинин кыайа тута иликпит. Онуоха сир, кыах баар. Биһиэхэ кэлиҥ, маннык бырайыактаахпын диэн көрдөрүн, салалта өттүттэн туох баар кыаллары барытын оҥорон көмөлөһүөхпүт. Атын улуустар холобурдарын билсиҥ, кинилэр туризмы хайдах кыайа туталлар эбитий. Кэлбит дьоҥҥо олохтоох бородууксуйаны, сувенирдары батарыы – эмиэ баһылыы илик хайысхабыт. Аны дьон кэллэхтэринэ түүннэри үлэлиир бородуукта маҕаһыына, киэһэ өттүгэр үлэлиир кафе диэн суох. Сынньанар сирдэргэ төлөбүрдээх парковкалары оҥоруҥ, кууһунан атыылыыр базата арыйыҥ. Баҕалаах киһи үлэлииригэр, дьиҥинэн, кыах улахан. Аны өҥөнү оҥорууну ылан көрүөҕүҥ: таҥас тигэр ателье суох, бэл баттах кырыйтараары гыннахха биир-икки парикмахерскай үлэлииригэр атыыр уочарат, массыына өрөмүөннэтээри гыннахха биир эрэ мастарыскыайдаахпыт, прачечнай туһунан киһи этэ даҕаны барыллыбат, элбэх ыалдьыт кэллэҕинэ хоннороору гыннахпытына үстүү хостоох икки-хас эрэ гостиницалаахпыт. Социальнай контракт бөҕөтө дьоммут ылаллар. Уонна ханна баалларый? Тоҕо үлэлээбэттэрий?,- диэн Степан Николаевич санаатын тоҕо тэбээтэ. Уонна мантан саас, сайын Амма улууһугар өрөспүүбүлүкэ таһымнаах элбэх тэрээһиннэр буолаары туралларынан онно атыыны-эргиэни сөптөөх таһымҥа ыыталларыгар ыҥырда.

Урбаанньыттар бэйэлэрин өттүлэриттэн баар кыһалҕаларын эмиэ ыраас мууска ууран биэрдилэр. Ол курдук, бастатан туран, үлэһит илии тиийбэтэ ыйылынна. “Бары диэбэппит эрээри, элбэх киһи оҕо босуобуйатыгар олороллорун ордороллор, үлэ миэстэтэ баар диэтэххэ, үлэлээбэккэ олорон итиннээҕэр элбэх харчыны ылабыт диэн аһаҕастык этэллэр” диэн баар суолу ыйаллар. Оттон сынньана кэлээччи дьоҥҥо ханна туох баарын, үлэлиир кэмин ыйан-кэрдэн биэрэр информация тиийбэт диэннэр, маны туоратарга инникитин ыласан үлэлэһиэх буолан сүбэлэстилэр.

Чахчы, биир идэлээх, биир хайысханы тутуһааччы дьон бу курдук атах тэпсэн олорон кэпсэтиилэригэр элбэх саҥа идеялар, санаалар киирэр буоллахтара. Бу да сырыыга Амма урбаанньыттара санаа атастаһан, тэрээһиннээх туризмы биир эмитэ нэһилиэккэ киллэрэн, үлэлэтэн көрөргө, итэҕэстэрин-үчүгэй өрүттэрин үөрэтэн көрөн, ол уопуту кыралаан улууска барытыгар тарҕатарга кэпсэтэн тарҕастылар. Оннуга да сөп – саҕалыахха эрэ наада, кэлэр сылларга тэрээһиннээх туризм син оннун булан олоххо бигэтик киирдэҕинэ айылҕабыт даҕаны ырааһырыа, дьон даҕаны дохуоттаах буоуло этэ.

Источник