Алтынньы 20 күнүгэр, үгэс быһыытынан, Нам улууһун Таастаах нэһилиэгэр тимир уустара мустан тимир уһаардылар.

Тэрээһин сүрүн сыала-соруга: былыргы саха тимирин уһааран ылар дьоҕуру салгыы сайыннарыы, киэҥ араҥаҕа тэнитии, кыһын тимир оҥоһуктары оҥорор тимирдэрин хааччыныы, уопут атастаһыыта уонна инники былааннары торумнааһын.

Санатар буоллахха Таастаах нэһилиэгэр тимир уһаарыыта Василий Иванович Герасимов салайыытынан, көҕүлээһининэн 2011 сылтан саҕаламмыта.

Кэнники сылларга тэрээһин Нам улууһун уустарын түмсүүтэ тэрийиитинэн ыытыллар.

Бу күн уопуттаах уустар:

Михаил Баишев – түмсүү салайааччыта (1 Хомустаах), Василий Герасимов – тимир ууһа (Таастаах), Алексей Пинигин (Лоҥхо Уус) – тимир ууһа (Хатырык), Прокопий Ильин – тимир ууһа (Нам с.), Александр Михайлов – тимир ууһа (Нам с.), Максим Попов – тимир ууһа (Таастаах), Иннокентий Данилов (1 Хомустаах) – Михаил Баишев үөрэнээччитэ үс оһоххо үлэлээтилэр.

Биирдии оһоххо 21 киилэ тимирдээх тааһы кутан, 3,5 киилэ болгуо тимири уһааран таһаардылар. Онон уопсайа 10,5 киилэ кэриҥэ болгуо тимири уһаардылар.

Тимири уһаарыы — саха омуга былыргы үгэстэрин культуратын харыстыыр биир сүрүн хайысхатын дьарыга буолар.

Киэҥ көрүүлээх, сахалыы туруктаах, тимир уһаарыытынан дьарыктанар биир дойдулаахтарбытыгар чэгиэҥ туругу, үрдүк ситиһиилэри баҕарабыт!

 «Нам улууһа» МТ пресс — сулууспата