Олох тупсан, бэлиэ күннэри, бырааһынньыктары сиэдэрэйдик ыларбыт үгэскэ кубулуйда. Тоҕо диэтэр, үтүө эрэ өйдөбүллэр хаалалларыгар хас биирдии төрөппүт, дьон кыһаллар буолбута – кэрэҕэ тардыһыы биир өрүтэ. Ону тэҥэ, ол ааспыт күннэри хаартыскалар туоһулуулларын күндүтүк саныахпыт.
Нам улууһун оскуоланы бүтэрээччилэрэ бэлиэ күннэригэр балай эмэ үп-харчы барбыт буолуохтаах. Оттон билигин оҕолорбут Дьокуускай куоракка үөрэххэ туттарсар кэмигэр сылдьаллар.
Ол курдук, оскуоланы бүтэрээччини үөрүүлээх бырааһынньыгар толору тэрийэн ыытарга “Золушка” диэн бырайыак олоххо киирдэ. Маны баҕа өттүнэн толкуйдаабыт кэрэ аҥардарга былааччыйа тигэр өҥөтүнэн дьарыктанааччы, Ленскэй нэһилиэк эдэр предпринимателэ Екатерина Суздалова тэрийдэ.
Иистэнньэҥ тылыттан, эрдэттэн үтүө көмөлөр интернет ситимигэр оҥоһуллалларын көрөр эбит уонна кини эмиэ ылсар санаата күүһүрэн испит. Ыра санаатын иитиэйэхтии сылдьыбыт эдэр киһи социальнай контракт нөҥүө ателье арынан атаҕар туруорар уонна дьоҥҥо көмөлөһөр ис санаатын олоххо киллэрэр.
Үөрүүлээх күҥҥэ үөрэ-көтө сылдьарга маникюр, кыламан, макияж, баттаҕы оҥостуу курдук өҥөлөр уонна саамай сүрүнэ – былааччыйа ирдэнэр. Холобура, иистэнньэҥ Екатерина Суздалова былааччыйа тигэр, тыҥырах киэргэтиитигэр Туйаара Рехлясова, макияж уонна баттах оҥоруутугар визажист Светлана Румянцева кыһамньыларын уурбуттар. Эбии, кыыспыт баттаҕын парикмахер Диана Павлова тупсарбыт.
“Золушка” бырайыак бэйэтин өҥөтүн үөрэххэ тардыһыылаах, ситиһиилэрдээх дьиҥ чахчы көмөҕө наадыйар кыыс оҕоҕо утары ууммута – эбээ иитиитигэр улааппыт, Хамаҕатта орто оскуолатын президенэ, көхтөөх көрүүлээх Филиппова Санаайаҕа. Санаайаҕа бэйэтин бэйэтэ көрүнүү, оттомноох буолуу, санаатын аһаҕастык этии хаачыстыбаларын бэлиэтиибин.
Биир идэлээхтэрбэр “көмөтө оҥоруохха” диэн этии киллэрбиппэр, бука бары, икки илиилэрин өрө көтөҕөн тута өйөөбүттэригэр махтанабын. “Мира”, “Туйаана”, “Светлана” маҕаһыыннар, “Урсун” полиграфия күүс-көмө, өйөбүл буолбуттара. “Студия Лайф” фотосессия оҥорбута. Бырайыак үгүс киһи биир санаанан түмсэриттэн, үлэлэһэриттэн оҥоһуллан тахсар. Ити курдук, бөлөх күүһүн уурбут бырайыак инникитин үлэлиэҕэ”, – диир Екатерина Семеновна.