Амма нэһилиэгин олохтоохторо Спартак уонна Марта Трофимовтар дьиэ кэргэнинэн сүбэлэһэн баран маҕаһыыннарын аттыгар “Босхо ыл туһан” диэн дьон болҕомтотун тардар баннеры ыйаан, аахсыйа биллэрэн олохтоохтору соһуттулар.
Эрдэ суруйан ааспыппыт курдук Трофимовтар дьиэ кэргэн бу иннинэ уопсастыбаннай эколог Иван Мохначевскай көҕүлээн олордубут “Кыайыы ойууругар” кини аатын үйэтитэр стендэ туруорбуттара. Ол кэнниттэн өр буолбакка, аны суол кытыытыгар төрөөбүт ийэ тылы харыстааһыҥҥа анаммыт үс улахан баннердары бэйэлэрин баҕа санааларынан уопсай сүбэнэн туруорбуттара. Дьиэ кэргэн аҕа баһылыга Спартак Михайлович бу курдук хас биирдии бэйэ дьыалатынан дьарыктанар киһи, төһө кыалларынан суол-иис хаалларар, дьоҥҥо-сэргэҕэ туһалаах буолар аахсыйалары ыытара наада диэн бэлиэтиир. Аны бу соторутааҕыта “Сулус” диэн уоллара Айыысиэн салайар маҕаһыынын аттыгар араас бородуукта, сүрүннээн фрукта, оҕуруот аһа кэлбит пенопласт, сетка дьааһыктарын, ону кытта тутуу матырыйаалларыттан профлист, хаптаһын ордуктарын нэһилиэнньэ кэлэн хайа баҕарар ыларыгар ууран биэрдилэр.
“Соһуйуохпут уонна үөрүөхпүт иһин бу балаҕан ыйыттан саҕалаабыт аахсыйабытын дьон сэҥээрэн, тута уурбут малларбытын ылан иһэллэр. Ол аата дьон наадыйар эбит. Маннык нэдиэлэҕэ биирдэ таһаарабыт. Маны сэргэ маҕаһыыммыт клиеннэригэр анаан чэпчэтинэр сир оҥорбуппут ыраатта. Ону чуолкайдыыр баннеры эмиэ ыйаан, дьон махтанарыттан үөрэбит. Уопсайынан мин бэйэм санаабар билигин уустук кэмҥэ, анал байыаннай дьайыы буола турдаҕына, үп-харчы кырыымчык, сорох түгэҥҥэ хамнас тардыллар кэмигэр нэһилиэнньэ уонна урбаанньыттар, биир тыынынан, биир санаанан олоруохтарын наада. Ханнык баҕарар урбаанньыкка син биир ордуктаах буолар. Ону таһааран, мээнэ ууран кэбиспэккэ, ыйынньык суруктаах уурара ордук буолуо этэ диэн. Дьон мээнэ ылбат. Баҕар бу бэйэлэрэ мунньубуттара буолуо игин диэн саныан сөп. Онон биһиги ити сүбэлэһэн баран итинник суруктаах уурарбыт быдан убаастабыл бэлиэтин биэрэр дии түмүккэ кэлбиппит. Дьон да астынар. Билиҥҥи кэмҥэ маннык үтүө саҕалааһыннар баар буолан киэҥ сэҥээриини ылыахтарын уонна биһиги холобурбутун өрөспүүбүлүкэ урбаанньыттара батыһалларыгар ыҥырабын”, — диэн Спартак Михайлович санаатын тириэртэ.