Бэс ыйын 18 күнүгэр, Сулҕаччы нэһилиэгэр  ыраастаммыт бутилированнай уунан нэһилиэнньэни хааччыйар сыах үлэтин саҕалаата. Сыаҕы улууска дьиэ кэргэн  экономикатын сылынан Лилия  уонна Кэнчээри Ксенофонтовтар арыйан, олохтоохтору үөртүлэр. Аны мантан ыла нэһилиэнньэ хайа баҕарар ыраас ууну иһэн доруобуйатын тупсарар кыахтанна.

“Биһиги бу сыаҕы эрдэттэн толкуйдаан баҕаран туран астыбыт. Билигин киһиэхэ ыраас уу олус наада. Уу киһи доруобуйатыгар наадалааҕын дьон барыта өйдөөн эрэр дии саныыбын. Уубут сыанатын билиһиннэрэр буоллахха, 20 лиитирэлээх иһит бастаан ыларга 550 солк. Онтон онно салгыы куттарар, эбэтэр бэйэҥ иһиккэр куттарар буоллаххына   100 солкуобай. Ууну дьиэҕэ тиэрдии өҥөтө баар. Оччотугар 20 лиитирэлээх иһит 120 солкуобай буолар. Маны таһынан помпа атыылыыбыт миэстэтигэр, сыаната 400 солкуобай. Сайаапканы төлөпүөнүнэн ылабыт”, — диэн Лилия Николаевна этэр.

Сыах таһыгар күөх акация талах олордулунна.  Үөрүүлээх бэлиэ тэрээһиҥҥэ нэһилиэк баһылыга Афанасий Егорович Ксенофонтов кэлэн эдэр предпринимателлэри эҕэрдэлээтэ, ситиһиилэри баҕарда. Саҥа саҕалааһын инникитин кэскиллэнэн, ситиһиилэнэн  өссө да үүнэн-сайдан кэҥээн иһэригэр эрэнэбит.