Кэлиҥҥи сылларга социальнай контракка кыттан бэйэ дьыалатын саҕалааһын үксээтэ. Дойду үрдүнэн хас биирдии дьиэ кэргэн, биирдиилээн дьон тиийинэн олоруу кээмэйин куоһарбат дохуоттаах буоллахтарына, бэйэ дьыалатын тэринэллэригэр судаарыстыба көмө оҥорор буолан нэһилиэнньэҕэ дохуоттаах буоларга, саҥа дьыаланы саҕалыырга дьоһуннаах өйөбүл оҥоһуллар буолла. Бу өйөбүл федеральнай уонна өрөспүүбүлүкэ биэрэр кубуоталарынан бэриллэр. Биһиги улууспутугар соцконтракка кыттыы тиһигин быспакка күргүөмнээхтик барар. Бүгүн соцконтракка кыттан бэйэлэрин дьарыктарын өссө сайыннаран нэһилиэнньэҕэ өҥө оҥорор ураты талааннаах дьоммутун кытары билиһиннэриэхпит.

Айыына Афанасьева, Үөһээ Бүлүү бөһүөлэгин олохтооҕо:

— Биһиги бу дьарыкпытын өссө 2017 сыллаахтан саҕалаабыппыт. Иккис кыыспыт төрөөбүт күнүгэр фотозона оҥорбуппут. Барытын лобзигынан быһан маска уһаммыппыт. Иллэҥ кэммитигэр дьарыктанарбыт. Бэлэххэ оҥорор буолбуппут. Быйыл социальнай контракка кыттыахпыт иннинэ, сөбүлүүр дьарыкпытыгар саамай наадалаах лазернай станок ылыммыппыт.

Оттон социальнай контракпыт үбүлээһининэн уһанарбытыгар туттар инструменнарбытын ылан олус үөрдүбүт. Үлэлэрбитин инстаграм сирэйгэ таһаарабыт. Онтон көрөн дьон сакаастыыр. Бэйэбит уһанарга анал үөрэхпит суох эрээри, иккиэммитигэр төрдүбүтүгэр уһанар дьонноохпут. Кэргэним аҕата тутуунан дьарыгырар, мин эһэм эмиэ үчүгэйдик уһанар этэ. Онон бэйэбит хааммытыгар баар буолан уонна арааһа, айылҕаттан дьоҕур баар буолан бу дьарыкпытынан умсугуйан туран дьарыктанабыт.

Билигин аныгы үйэҕэ интэриниэттэн уһаныы кистэлэҥнэригэр үөрэнэбит, бэйэбитиин сайыннарабыт. Билигин дьиэ фронтонугар харысхал оҥоробут. Сүрүннээн оҕолор төрөөбүт күннэригэр, дьиэ кэргэҥҥэ бэлиэ күннэргэ тылы суруйабыт, фотозонаны оҥоробут, саҥа дьылга каминнары, араас бырааһынньыктааҕы оҥоһуктары, харыйа оонньуурдарын, оҕо уһуйааннарын тэлгэһэлэригэр фигуралары, суотабай төлөппүөн подставкатын, эт, балык, ас кырбыыр дуоскалары кэргэмминээн оҥоробут.

Бэйэм точечнай роспиһынан дьарыктанабын. Араас харысхаллары оҥоробун. Оҕо, дьахтар, эр киһи, дьиэ кэргэн, баай-дуол, о.д.а. харысхалларын оҥоробун.Биһиги уһаннахпытына, точечнай роспиһынан дьарыктаннахпына, дууһалыын сынньанабыт, дуоһуйууну ылабыт. Бэйэбит үс оҕолоохпут. Билигин дьиэ тутта сылдьабыт. Эдэр ыал дьиэ туттарыгар аналлаах субсидияны ылбыппыт. Онон эдэр ыалы, дьон дьарыктаах буолуутугар өйөбүлү оҥорор, кыаҕы биэрэр судаарыстыбабыт, улууспут көмөтүттэн олус үөрэбит, махтанабыт. Ким дьарыккытын сайыннаран, кэҥэтэн, нэһилиэнньэҕэ өҥөтө оҥоруҥ диэн босхо харчы киллэрэн биэриэҕэй? Онон дьон-сэргэ сааһыттан тутулуга суох туох эмит дьарыктаах буоллаххытына, киэҥ эйгэҕэ тахсан, социальнай контракка кыттан, судаарыстыба биэрэр өйөбүлүн туһанан, баҕаҕытын олоххо киллэриҥ, нэһилиэнньэҕэ өҥөтө оҥоруҥ диэн сүбэлиэм этэ.

Домна Лебедкина, Үөһээ Бүлүү бөһүөлэгин олохтооҕо:

— Мин түөрт оҕолоох ийэбин. Аан бастаан оҕолорбор оонньуурдары оҥорбутум. Инстаграмтан көрөн Анастасия Рудницкая диэн маастар ссылкатын буламмын, лекалатын үөрэтэн, иистэнии технологиятыгар үөрэммитим. Былырыын оҕом атаҕын өлөрөн Санкт-Петербурга эмтэнэ барар буолбуппут. Ити кэмнэргэ оҕобор оонньуур бэйэм тигэн оҥорбутум уонна батсаап ситимигэр статуспар таһаарбытым. Ону көрөн аймахтарым, атын да дьон оонньууру сакаастаан барбыттара. Оннук харчы киллэринэн, мунньан оҕом операциятыгар баран кэлбиппит. Онтон социальнай контракка кыттан көрбүт киһи диэн баҕа санаа үөскээбитэ.

Урут иистэнэр массыынаны дьонтон уларсан тигэр буоллахпына, билигин социальнай контракка кыттан, көрүллүбүт үбүнэн иистэнэр массыына, лен, хлопок матырыйааллары ылбытым. Үлэлииргэ, бэйэ дьыалатын саҕалыырга усулуобуйаны оҥорор судаарыстыбаҕа олорорбунан олус астынабын. Ону сөпкө өйдөтөр, сүбэлиир «Мин биисинэһим” киин Үөһээ Бүлүүтээҕи салаатын сэбиэдиссэйигэр Екатерина Васильевна Николаеваҕа махтанабын. Мин бэйэм Чап уустарыттан сыдьааннаахпын. Таккай тимир ууһун Таркаев Савва Николаевич хос сиэнэбин. Эбэм Таркаева Домна Саввична аатынан ааттаммытым. Баҕар ол иһин илиибэр талааннааҕым буолуо. Мин сүрүн дьарыгым-оонньуур тигиитэ.

Билиҥҥи оҕолор сөбүлээн, сэҥээрэн оонньуур, киэҥник биллэр сиреноголовый, баайыы уонна интерьерга аналлаах тигии оонньуурдары, тыа кыылларын тигэн, кыһыл оҕо оронугар аналлаах бортик сыттыктары сакааска оҥоробун. Ону таһынан макраме өрөбүн, бэлэххэ сакалаатынан сибэкки, торт оҥоробун. Оҕолорбун кытары элбэх күрэхтэргэ кыттабыт. “Три кота” бэргэһэни, дьуутабай сабынан корзинкалары баайабын. Билигин кэлэр сылга биһиги улууска ыытыллыахтаах Олоҥхо ыһыаҕар аналлаах олоҥхо дьоруойдарын куукулаларын оҥоруохтаахпын. Бу соторутааҕыта инстаграм нөҥүө үлэни рекламалааһыҥҥа, бэйэ бородууксуйатын, оҥоһугун киэҥ эйгэҕэ, дьон билиитигэр таһаарыыга үөрэнэн кэллим. Салгыы инстаграм сирэй нөҥүө күүскэ үлэлэһиэм. Ону тэҥ Ону тэҥэ бэйэм дьарыктарбынан маастар-кылаастары тэрийиэхпин баҕарабын. Бу сотору «Мой бизнес» диэн урбаанньыттар күрэхтэригэр кыттаары сылдьабын.

Саргылана Афанасьева, Үөһээ Бүлүү бөһүөлэгин олохтооҕо:

— Биһиги аан бастаан бэйэ дьыалатын саҕалыырга олус элбэх идеялаах этибит. Онтон биири — эпоксиднай сымаланан иһити, дьиэ киэргэлин, хартыыналары, о.д.а. оҥорууга тохтообуппут. Бу идеябытын олоххо киллэрэрбитигэр саҕалыыр хапытаалбыт суох этэ. Онон муус устарга социальнай контракка кытынныбыт.Туттар тэрилбитин, смолабытын Дьокуускайтан туох баарынан сороҕун эрэ ыллыбыт. Уоннааҕытын сакаастаан кэтэһэ сылдьабыт. Билигин олохпут олус сайынна, интерьер эмиэ муҥура биллибэт киэҥ саҕахтанна. Хас биирдии киһи, дьиэ кэргэн кимиэхэ да майгыннаабат, ураты тэриллээх, интерьердаах буолуон баҕарар буолла. Онон биһиги сакааспытын, үлэбитин сүрүннээн биирдиилээн ыал, дьон интерьерын киэргэтиигэ, байытыыга үлэлэһэр соруктаахпыт, баҕалаахпыт.

Холобур, биһиэхэ куукунабыт ыскааба маннык, онуоха сөп түбэһэр ураты иһиттэр наадалар диэтэхтэринэ, биһиги көрөн-истэн, талларан, аныгылыы тупсаҕай иһиттэри кутан оҥоруохпутун сөп. Эбэтэр ыскааптарыгар фосфор сымалатын ингредиеннарын кутан оһуор түһэриэхпитин сөп. Ол оһуор уоттаах, тыга турар курдук көстөр буолар. Хартыыналары эмиэ дьон баҕатынан, сакааһынан оҥоруохпутун сөп. Холобура, интерьерга сөп түбэһэр хартыыналары: муора, айылҕа, о.д.а. Чаһылары, ыстакаан уурар подставкалары, сурунаал остуолун, фрукта уурар иһиттэри, ытарҕалары кутан оҥоробут. Бэйэм идэбинэн физикпин. Бу саҥа саҕалыыр дьарыкпытын инстаграм сирэй арыйан дьоҥҥо-сэргэҕэ биллэриэхпит, сакааспытын саҕалыахпыт,- диэтэ.

Дьэ, ити курдук улууспут бэйэ дьыалатын арынан, тэринэн дохуот киллэриниэн баҕалаах дьоно-сэргэтэ, ыччата бэйэҕит искитигэр санааҕытын, идеяларгытын саһыара сылдьыбакка, киэҥ эйгэҕэ тахсан, судаарыстыба көрөр көмөтүн туһаныҥ, нэһилиэнньэ наадыйар бородууксуйатын оҥорон таһааран билиҥҥи олоҕу кытта тэҥҥэ хардыылааҥ! Социальнай контракка кыттыы кубуотатын, ирдэбиллэрин туһунан олохтоох дьаһалтаҕытыттан туоһулаһыҥ, сүбэлэтиҥ. Үүнүү-сайдыы суола — эһиги иннигитигэр!

Маытырйаалы UlusMedia саайтан туһанныбыт https://xn—-8sbafahlaethmnm0a1cxay7b3m.xn--p1ai/article/18442 Сигэтэ https://xn—-8sbafahlaethmnm0a1cxay7b3m.xn--p1ai/article/18442