Абаҕа нэһилиэгин И.Я. Строд аатынан тыа хаһаайыстыбатын производственнай кээпэрэтиибэ быйылгы кыстыкка 4 хотонунан 500 тахса сүөһүнү киллэрдэ. Билигин Емельяновка учаастагар икки хотоҥҥо 120 хороҕор муостаах турар.
Хаһаайыстыба кыстыкка балаҕан ыйыгар көһөн киирбит. Үлэһиттэр эмиэ оннуларын булунан, дьиэлэрин-уоттарын тэриммиттэр. Ыанньыксыттар Емельяновка учаастагар олорон, үрдүттэн сылдьан үлэлээн абыраммыттар. Үлэ хаамыытын туһунан хаһаайыстыба биригэдьиирэ Марфа Тимофеева маннык билиһиннэрэр:
— Быйыл кыһын 4 хотонунан кыстыыбыт, Емельяновкаҕа 120 ыанар ынах, Абаҕаҕа бэйэтигэр 60 сүөһү турар. Быйылгы ньирэйдэри туспа арааран кыстатабыт уонна тиҥэһэлэр бааллар. Үүппүт былаанын бу сыл бүтэһигэр диэри толорор санаалаахпыт, былааммыт 650 этэ, онно эбии тиэрдэннэр уопсайа 700 тонна буолла. Сүөһүлэрбит аһынан-үөлүнэн хааччылыылара үчүгэй, от, сенаж, соломо баар, күн аайы сиилэс биэрэбит.
Бу кыһын төрүөх эрдэ саҕаламмыт буолан билигин ынахтар уолан эрэллэр диэн хаһаайыстыба ыанньыксыта Лена Ксенофонтова кэпсиир:
— Амма улууһугар кэлэммин ыанньыксытынан үлэлээбитим 6 сыл буолла. Быйылгы кыстыкка 30 ынаҕы көрөбүн-истэбин, сүөһүлэрим туруктара үчүгэй, аһылыктара да хааччыллан турар. Сорох ынахтарбыт сотору төрүөхтэрэ, ону күүтэбит. Хамнаспыт ый аайы болдьоммут кэмигэр кэлэр. Онон үлэлииргэ усулуобуйа баар, эдэр ыччаттары тыа хаһаайыстыбатыгар кэлэн үлэлээн диэн ыҥырабын.
Үрүҥ ас үрүлүйэрин, эт дэлэйэрин туһугар үлүмэнэһэ үлэлиир дьоммут сыралара кэмигэр, сөптөөхтүк сыаналанар буолан санаалара кэлэн, «Амма — үлэ көхтөөх киинэ» диэн ырыаҕа ылланар тыллары толору туоһулууллар.