Амма улууһун баһылыга Степан Кузьмин “Социальнай хантыраак — дьиэ кэргэн дохуоттанарыгар бигэ тирэх” диэн быыстапка -дьаарбаҥкаҕа сылдьан эттэн араас бородууксуйалары оҥорор Евгений Павлов үлэтин-хамнаһын сэргээбитэ. Ол кэнниттэн уталыппакка, оҥорон таһаарааччы урбаанньыты кытта баран миэстэтигэр көрүстэ.
Улуус баһылыгын кытта “Биисинэс -инкубатор” тэрилтэ дириэктэрэ Николай Афанасьев, улуустааҕы тыа хаһаайыстыбатын управлениетын салайааччытын солбуйааччы Алексей Шишигин сырыттылар. Урбаанньыт Евгений Павлов үлэлиир сирин көрдөрөн, хайдах-туох былааннаардааҕын билиһиннэрдэ. Кини ааспыт сылга социальнай хантыраак көмөтүнэн халбаһыы оҥорор оборудование ылынан кыралаан бу уустук соҕус эрээри, нэһилиэнньэ наадыйар бородууксуйатыгар ылсан эрэр. Евгений оҥорбут халбаһыыларын, атын ыыһаммыт бородууксуйаларын дьаарбаҥка кэмигэр көрүөх бэтэрээ өттүнэ атыыласпыттара.
Онтон да көстөрүнэн дьон-сэргэ бэйэ сиригэр-уотугар оҥоһуллубут бородууксуйаҕа наадыйар эбит. Күн бүгүн Евгений дьиэ кэргэнинэн бу биисинэскэ үлэлиир. Атын үлэһит суох. Онон дьиэ кэргэн биисинэһэ диэн хайа баҕарар ааттыахха сөп.
“Бу ыыһыыр оһохпун бэйэм оҥорбутум. Онно үөрэхтээхпин. Өссө манна олохтоох сыбаарсыгы кытта кэпсэтэн тупсарыахтаахпын. Быйыл бородууксуйаларбар барытыгар сертификация ыллым. Уопсайа 70-тан тахса көрүҥү оҥоруохпун сөп. Онно анаан минээн Москубаҕа үөрэнэн “технология мяса и мясных продукций” диэн идэни кыһыл дипломунан бүтэрдим. Өссө салгыы үөрэниэхпин баҕарабын. Элбэххэ үөрэтэллэр. Аны Роспотребнадзору кытта дуогабар түһэрсиэхтээхпин”, — диэн Евгений кэпсиир.
Кини бу ылсыбыт дьыалатын кэҥэтэр, өссө сайыннарар былааннаах. Халбаһыыны, ыыһаммыт эти таһынан, өссө эт астан полуфабрикаттары оҥорор. Манна киниэхэ күүс-көмө кэргэнэ буолар.
“Биһиги улууспут дьаһалтата маннык бэйэ бородууксуйатын оҥорон таһаарар дьону олох өйүүбүт. Туох күүс-кыах баарынан көмөлөһүөхпүт. Евгений Павлов сыаҕын көрөн баран, киниэхэ бэйэбит көмөбүт баар буолуо диэн эттибит. Ол сүрүннээн кини бу сыаҕар толору хааччыллыыны киллэриитигэр буолуо. Киһи баарын тухары аһылыкка наадыйар. Онтон ол аһылыга ыраас, доруобай, бэйэ бородууксуйатыттан оҥоһулларын ордук хото ылыаҕа диэн бүк эрэнэбин. Онон бу Павловтар саҕалаабыт дьыалалара кэскиллээх уонна интэриэстээх ”, — диэн баһылык Степан Кузьмин санаатын этэр.
