Стелла уонна Александр Антоновтар биһиги улууска «Профото» диэн полиграфия өҥөтүн оҥорор тэрилтэ тэринэн, бар дьон туһугар үрдүк хаачыстыбалаахтык, үтүө суобастаахтык үлэлээн, саҥа саҕалааччы урбаанньыттарга үтүө холобурунан буолаллар.
Бу күннэргэ эдэр ыал «Бизнес — дело семейное» диэн өрөспүүбүлүкэтээҕи форумҥа кыттан, «Бастыҥ дьиэ кэргэн урбаанньыттар» диэн анал аакка тиксэн, улууспутун ааттатан, үрдүк ситииһилэннилэр.
Александр Антонов, «Профото» тэрилтэ салайааччыта, урбаанньыт: «Урбаанньыттар нэдиэлэлэрин чэрчитинэн бу ый 24 күнүгэр Дьокуускайга Орто дойду туркомплекска «Бизнес -дело семейное’ диэн урбаанньыттар форумнарыгар кыттар чиэскэ тигистибит. Программаҕа спикер, бизнес-консультант Джулустан Иванов семинарын интэриэһиргээн иһиттибит, элбэҕи биллибит-көрдүбүт. Күн иккис аҥарыгар «Перспективы развития семейного предпринимательства» диэн стратегическэй сессия ыытыллына. Манна форум кыттааччылара 5 хамаандаҕа арахсан үлэлээтилэр, дьиэ кэргэн бизнеһэ хайдах сайдыахтааҕын бэйэлэрин этиилэрин, боппуруостарын биэрдилэр. Олус интэриэһинэй хамаанданан оонньуу буолла диэн бэлиэтиэххэ наада.
Форумҥа 34 тэрилтэ кыттыбытыттан 8 иһигэр киирэн, «Лучшее семейное предпринимательство» аатын сүгэн, салгыы Москва куоракка Бүтүн Арассыыйатааҕы форумҥа кыттар чиэскэ тигистибит.
Бу үрдүк таһымнаах тэрээһини ыыппыт «Мин биисинэһим» киин коллективыгар, кыттарбытыгар сүбэ-ама биэрбит Үөһээ Бүлүүтээҕи «Мин биисинэһим» киин салайааччытыгар Екатерина Васильевнаҕа махталбытын тиэрдэбит».