Чакыр нэһилиэгэ Амма улууһугар соҕотох өрүс нөҥүө биэрэгэр сытар нэһилиэк. Онон күһүн уонна саас өрүс хаайтарыытын билэллэр. Быйылгы курдук дьыл хойутаан иһэр кэмигэр олохтоохтор бэтэрээ биэрэккэ туоруулларыгар улахан моһуогу көрсө иликтэр. Кинилэргэ көмө аахсыйатын урбаанньыт Спартак Трофимов оҥоро сылдьар.

Быйыл күһүн өрүс өр томмокко туран, хаайтарыы кэмигэр Амматтан урбаанньыт Спартак Трофимов тахса сылдьар уонна олохтоохтору нөҥүө биэрэккэ туоратарга көмөлөһөр. Ол курдук кини аэролодка диэн тэрил ылбытын, ону дьыалатыгар көрдөрүөн баҕарар эбит. Онон икки күн устата сылдьыбыт.  Кини дьону буор босхо бэйэтин суотугар туоратар.

Чакыр нэһилиэгин баһылыга Прокопий Прокопьев санаатын үллэһиннэ:

«Спартак Михайловичка биһиги махталбыт улахан. “Сырыылаах нэһилиэк эбит” диэн соһуйар. Хаайтарыы кэмигэр нэһилиэккэ килиэп, араас эмп-томп, атын улахан кыһалҕалаах дьоммутугар бу күннэргэ олох абырал буолла. Кини бу лодканы үлэҕэ көрдөрөн, нэһилиэк да, улуустааҕы сулууспата да маннык оҥочону ылыахтарын наадатын уонна сыаната да удамырын этэр. Онон инникитин толкуйдуохпут».

Чакыр олохтоох дьаһалтата үтүө санаалаах урбаанньыкка бэйэтин Махтал суругун туттарда.

Үлэ сылыгар «Мин биисинэһим» киин өрөспүүбүлүкэ экономикатын сайдыытыгар бэйэ кылааттаах урбаанньыттар үлэлэрин-хамнастарын туһунан сырдатар. Биһиги урбаанньыттарбыт туруу үлэһиттэр буолалларын уопсастыба сыаналыыр уонна биһириир.

«Дьоҕус уонна орто урбаан» национальнай бырайыак чэрчитинэн «Мин биисинэһим» киин нөҥүө урбаанньыттарга киэҥ хабааннаах араас өҥө көрүллэр. Бу туһунан ыйыллыбыт сигэнэн киирэн ааҕыахха сөп – Мойбизнес14.рф

ГАУ РС(Я) «Центр «Мой бизнес»