Өспөх нэһилиэгэр Гульнара, Иннокентий Дьячковскайдар сүөһү көрөр-иитэр кэпэрэтиип тэриннилэр. Элбэх оҕолоох эдэр ыал хаһаайыстыбаларын «Сайдыы» диэн ааттаан, ходуһа, хотон туттар сир анатан, кыттыһар хаһаайыстыбаларын кытта дуогабардаһан, докумуоннарын бэлэмнээн быйыл тыа хаһаайыстыбатын министиэристибэтин куонкуруһугар кыттан 100 сүөһү турар хотонун туттарга субсидияҕа тиксибиттэрэ.
Ыраах нэһилиэккэ сүөһү иитиитинэн дьарыктанан эрэр эдэр дьон хайдах-туох дьаһана сылдьалларын Өспөх баһылыга Лена Свешникова билиһиннэрдэ:
– Хаһаайыттар сайын устата хотоннорун туттан кыстыкка киирдилэр. Онуоха олохтоохтор субуотунньугунан көмөлөстүбүт. Өссө даҕаны силигин ситэрэн 2024 сылга отчуоттуохтаахтар, онон сүөһү сааҕын таһаарар транспортер, автопоилка, ыыр аппарааттары атыыласпыттара тимир суолунан айаннаан сэтинньи бүтүүтэ кэлэрин күүтэллэр уонна хотонноро турар сиригэр уот ситимин тардарга сайаапкалаабыттара оҥоһулларын кэтэһэллэр.
Тыа сиригэр ханна даҕаны саастаах дьон сүөһүнү көрүүнү-истиини кыайбат буолан иһэллэр. Биһиэхэ да оннук. Онон маннык кэпэрэтииптэр наадалар. Дьячковскайдарга билигин 60-ча төбө ынах сүөһү кыстыкка киирдэ. Сайын күн-дьыл туран биэрэн, кыһыны туоруурга сөп буолар отторун булунан олороллор.
Саҥа тэрээһин үп-харчы өттүн ааҕынан, олохтоохтору үлэ миэстэтинэн хааччыйан былаан быһыытынан сөпкө дьаһанан үлэлээтэҕинэ, нэһилиэккэ олус туһалаах буолуо этэ. Үлэһит ыалга былааннара табыллан иһэригэр, саҥа хотоҥҥо сүөһүлэрэ этэҥҥэ кыстаан, барыта табыллан Өспөхпүтүгэр бэйэ үрүҥ аһа, этэ-аһа элбииригэр баҕарабыт.