Бүгүн, муус устар 20 күнүгэр, Абый улуус дьаһалтатыгар социальнай контракт нөҥүө олохторугар уустуктары көрсүбүт биирдиилээн дьоҥҥо уонна ыалга биир кэмнээх харчынан көмөнү көрөр хамыыһыйа мунньаҕа буолан ааста.
Хамыыһыйаҕа нэһилиэнньэ социальнай көмүскэллээх буолуутун управлениетын салайааччыта, улуус Сэбиэтин бэрэссэдээтэлэ Айдар Ефимов, улуус баһылыгын солбуйааччы Алексей Петров, Белай Гора бөһүөлэгин баһылыгын солбуйааччы Айсен Мыреев, нэһилиэнньэ дьарыктаах буолуутун киинин начаалынньыга Татьяна Межова, предпринимательство киинин салайааччыта Мария Иванова, нэһилиэнньэ социальнай көмүскэллээх буолуутун управлениетын испэсэлииһэ Елена Бережнова үлэлээтилэр.
Мунньах бэбиэскэтигэр судаарыстыбаннай социальнай көмөҕө биир кэмнээх харчынан көмө оҥоруутугар нэһилиэнньэттэн киирбит сайабылыанньаны көрдүлэр. Маннык көмөҕө биирдиилээн дьоҥҥо 24369 солк, дьиэ кэргэн аатыттан киирбиккэ 73107 солк көрүллэр эбит. Хамыыһыйа сүрүн болҕомтотун элбэх оҕолоох ыалларга уонна алын хамнаһы аннынан дохуоттаах дьоҥҥо уурда. Быйылгы сылга биирдиилээн дьоҥҥо бэриллэр көмө үпкэ биэс квота көрүллүбүт буоллаҕына, көмөҕө наадыйааччы 11 киһи сайабылыанньата киирбит. Маны хамыыһыйа болҕомтоҕо ылан, сыл аҥарыттан квотаны эбии элбэтэргэ үлэлэһэри быһаарда.