Бүгүн улуус баһылыгын социальнай боппуруоска солбуйааччы Саргылаана Борисова урбаанньыттары кытары көрүстэ. Мунньахха салалта уонна урбаан ситимнээх үлэтин туһунан кэпсэттилэр.
Урбаанньыттары кытта көрсүһүү наҕараадаттан саҕаланна. Саргылаана Борисова уонна улуус дьахталларын сэбиэтин бэрэссэдээтэлэ Марфа Дмитриева куруук күүс-көмө буолар урбаанньыттарга махталларын биллэрэн туран “Саха АССР төрүттэммитэ 100 сыла” бэлиэлэри, бочуоттаах грамоталары туттартаатылар. Өрүү үбүнэн өйүүр, малынан-салынан хааччыйар спонсордар Людмила Куприянова, Альбина Аммосова, Саргылаана Тимофеева, Анна Брызгаева, Екатерина Романова, Иван Заровняев, Валерий Максимов, Наталья Шишигина, Ксения Пестерева уо.д.а. сылаас тылынан ахтылыннылар.
Кэпсэтии сүрүннээн оҕолор бытовой гааһы, электроннай табаҕы, быырпаҕы атыылаһар түбэлтэлэрин бохсуу туһунан барда. Манна административнай хамыыһыйа сэкэрэтээрэ Анатолий Стручков, сокуоннай саастарын ситэ илик оҕолор хамыһыйаларын эппиэттээх сэкэрэтээрэ Виктория Феоктистова иһитиннэриилэрин оҥордулар. Ону сэргэ атыыланар табаар сыанатын үрдэтии туһунан Амма улууһун борокуруора Михаил Николаев, “Тариф агенствота” Амматааҕы салаатын сүрүн эспиэрдэ Роман Филатов сэрэтэр тылларын эттилэр.
Мунньахха ханнык туох кэпсэтиилэр барбыттарын, быһаарыныыларын ылыллыбыттарын туһунан сиһилии “Амма олоҕо” хаһыакка билсиһиннэриэхпит.