Сииттэбит нэһилиэгэ ханнык баҕарар тыа сиригэр буоларын курдук, олохтоохтор тыа хаһаайыстыбатынан утумнаахтык дьарыктана олороллор. Төрүт дьарыкпыт — олохпут сайдар төрдө диэн санааны өрө тутан, өбүгэ саҕаттан илдьэ кэлбит сүрүн дьарыкпытын, хороҕор муостааҕы, сыспай сиэллээҕи иитэн, көрөн — истэн, сыл аайы төрүөҕү элбэтэн иһэргэ кыһаллабыт.
Билигин тыа сиригэр сүөһүтэ — аһа суох туох да кыаллыбат кэмэ. Сииттэлэр сүрүн сыалбыт диэн сибиэһэй бэйэ бородууксуйатынан аһаан — сиэн, хардары — таары эргинэн дохуот килэриниитин боппуруоһа бөһүөлэкпитигэр бастакы турар. Нэһилиэкпитигэр тыа хаһаайыстыбатын сайыннарар инниттэн, араас боппуруостары торумнаан көрөн баран, олохтоох дьаһалта баһылыга Семен Тимофеев 2022 сыллаахха хаан уларытаары, Кэбээйи нэһилиэгэр баар биир бастыҥ үлэлээх — хамнастаах бааһынай хаьаайыстыба салайааччытын Аксиния Васильевна Левинаны кытта сүбэлэһэн , «Алтай» боруода ньирэйдэри удамыр сыанаҕа атыылаһарга диэн икки өттүттэн кэпсэтии ыыппыттара. Ол кэнниттэн уталыппакка, сонун боруода ньирэйдэри Кэбээйиттэн аҕалан, түөрт ыалга түҥэппиттэрэ. Хаһаайыттар саҥа сонун боруодалары көрөн — истэн, биэбэйдээн, номнуо быйыл бастакы төрөлкөй төрүөхтэри ылбыттарын туһунан үөрүүлээх сонуммутун үөрэ — көтө улууспут дьонун — сэргэтин кытта үллэстээри суруйдубут.
Ньирэйдэрбит ийэлэрин курдук эмиэ «алтай» боруодалар төрөөтүлэр, олус сытыылар, тэтиэнэхтэр. Ынахтарбыт быр курдук үүттээхтэр, киһи астына ыыр сып — сымнаҕас эмиийдээхтэр, майгылара диэн сымнаҕаһа, сирбэттэр — талбаттар, аҥар кырыы аһаан — сиэн кимиритэн иһэллэринэн, ынахтарбытын олус сөбүлээтибит. Онон нэһилиэкпитигэр сонун, саҥа боруода сүөһү төрүөҕэ — ууһуоҕа, тарҕаныаҕа, үрүҥ аһы үрүйэлии сүүрдүөхпүт диэн эрэлбит улахан.
Бастатан туран улахан махталбытын баһылыкпытыгар Семен Тимофеевка уонна Аксиния Левинаҕа тиэрдэбит. Үлэҕит таһаарыылаах, доруобуйаҕыт туруктаах буоллун диэн алгыс баһын сыалыыбыт. Нэһилиэк бары салайааччылара, бар дьонноругар саҥа сүүрээннэри, сэргэх хамсааһыннары таһааран, сайдыы суолугар салайалларын нэһилиэкпит олохтоохторо инникитин өйдүөхтэрэ уонна өйүөхтэрэ диэн эрэниэҕи баҕарыллар.