Сэргэ Бэскэ хортуоппуйу үүннэрэр хаһаайыстыба салайааччыта Александр Фомин Арассыыйа бааһынай хаһаайыстыбаларын уонна тыа хаһаайыстыбатын кэпирэтииптэрин Ассоциациятын ХХХIII сийиэһигэр кытынна. Сийиэскэ уопсайа 70 эрэгийиэнтэн дэлэгээттэр кэлбиттэрэ. Саха сирин 11 киһилээх дэлэгээссийэтин өрөспүүбүлүкэтээҕи Ассоциация Президенэ Александр Артемьев салайан илдьэ сырытта.
«Олунньу 16-17 күннэригэр ыытыллыбыт сийиэскэ дьоҕус хаһаайыстыбалар инники сайдар кыахтарын туһунан кэпсэтии буолла. Икки күннээх сийиэһи Арассыыйа фермердэрин уонна тыа хаһаайыстыбатын кэпирэтииптэрин ассоциациятын Президенэ Владимир Плотников салайан ыытта. Сийиэс бастакы күнүгэр ыйытыктарга хоруй бэрээдэгинэн барда. Иккис күҥҥэ дойду тыа хаһаайыстыбатын миниистэрэ Дмитрий Патрушев кэлэн кытынна. Эрэгийиэннэр баар кыһалҕаларын ыйан туран, элбэх боппруостары туруорустулар. Бастатан туран, сыана үрдээһинэ, бородууксуйа,уоҕурдуу, уматык, тиэхиньикэ, саппаас чаас сыаната сиппэт гына хас эмэ төгүл ыараан иһэрэ долгутарын эттилэр. Саха сирин дэлэгээссийэтэ бэйэтин элбэх этиилэринэн кытынна. Ол иһигэр «Агростартап» бырагыраамата тыа сиригэр эрэ буолбакка, куорат эргин эмиэ үлэлиирин ситиһэргэ, тыа сиригэр кадрдардар тиийбэттэрин хайдах өйүүр туһунан, онтон да атын этиилэрбит резолюцияҕа киирэннэр тустаах уорганнарга тиийэн быһаарыллыахтара диэн күүтэбит», — диэн этэр Александр Фомин.
