Кыра дохуоттаах ыал олорор усулуобуйатын тупсарарыгар судаарыстыбаттан көдьүүстээх көмө ылыан сөбүн биир чаҕылхай холобурунан Саргылана Сивцева буолла. Бэйэ дьарыктаахтар ахсааннарын хаҥатан социальнай хантараагынан уонна Үлэлээх буолуу кииниттэн көмө ылан, ол харчытыгар профессиональнай аппараттары ылынан сэбэрэни тупсарар салон арыйан үлэтин саҕалаата. Саргылана Александровна мин бисиинэһим неҥуе ИП регистрацияланан улэтин са5алаата.
“ViVi” кэрэ сэбэрэ салона “Бизнес инкубатор” сырдык, ыраас, сылаас уораҕайыгар олохсуйда. Бу – бэйэ дьыалатын саҥа тэринэр дьоҥҥо судаарыстыба өссө биир көмөтө. Саргылана Александровна манна чэпчэтиилээх усулуобуйанан хос наймылаһар, үс сыл устата коммунальнай өҥө иһин эрэ төлүүр. Бэртээхэй өйөбүл буолбатах дуо?
-Мин медицинскэй сиэстэрэ идэлээхпин. Ону чуолаан дьону кэрэ оҥорор салааҕа үлэлэһэр баҕа санаалаах буоламмын Дьокуускайга “Косметон” клиникаҕа “Медицинская сестра в косметологии” диэҥҥэ переквалификация бараммын салон арынан үлэлэтэр былааннаахпын. Биһиги улууспутугар сэбэрэни ыраастыыр өҥө оҥоруута улаханнык тэнийэ, сайда илик диэн санааттан ылсан эрэбин. Германияҕа уонна Россияҕа оҥоһуллубут аппараттары, үчүгэй кыахтаахтары көрөн атыыластым. Бүгүн салонум үөрүүлээх аһыллыыта буолла, сарсыҥҥыттан саҕалаан үлэлээн барыам. Элбэх дьон номнуо ыйыталаһаллар, хаһан үлэлээн саҕалыыгын диэн, уонна киин куораты кытта тэҥнээтэххэ сыанам удамыр буолуо, онон дьон кэлиэхтэрэ, сылдьыахтара дии саныыбын,- диэн элбэх оҕолоох ийэ, бэйэ дьарыктааҕа Саргылана Сивцева үөрүүтүн үллэстэр.
Саҥа салон үөрүүлээх аһыллыытыгар “ViVi” хаһаайкатын учуутала, “Косметон” клиника салайааччыта Анастасия Степанова, улуустааҕы социальнай көмүскэл управлениетын исписэлииһэ Сахаяна Неустроева, чугас дьүөгэлэрэ эҕэрдэлээтилэр, салон үлэтэ кэҥээн, нэһилиэнньэ ортотугар биһирэбили ыла турарыгар баҕа санааларын тиэртилэр.
Кэрэ аҥардарга эрэ буолбакка, эр дьоҥҥо эмиэ мин өҥөлөрүм көмөлөөх буолуохтара диэн Саргылана Александровна интэриэһиргээбит дьону бэйэтин салонугар ыҥырар.