Николай Егорович аҕатын туйаҕын хатаран оскуоланы бүтэриэҕиттэн механизаторынан үлэлиир. Аҕата Егор Иванович Артемьев Үлэ бэтэрээнэ, «Бочуот знага» орден кавалера. Сатаҕай нэһилиэгин сайдыытыгар, улахан тутууларга мас таһыытыгар, оттук маһы, оту тиэйиигэ соҕотох тырахтарыыс Егор Иванович өҥөтө улахан диэн биир  дойдулаахтара махтана ахталлар, саныыллар.

Билигин уола Николай Артемьев 2010 сыллаахтан урбаанньыт быһыытынан үлэлиир. Ол курдук, хайдахтаах да  тымныыны аахсыбакка олохтоохтор отторун, мастарын тиэйэр, араас өҥөнү оҥорор. Бэйэтин баҕатынан хаар, ардах түстэҕинэ нэһилиэк иһинээҕи уонна кэккэлэһэ сытар Бүтэйдээх нэһилиэгэр диэри суоллары ыраастаан, көннөрөн дойдутун дьонун махталын ылар.

Николай Егорович үлэтэ  сыаналанан Үлэ бырааһынньыгын көрсө Амма улууһун баһылыгыттан Махтал сурук тутта уонна «Сатаҕай нэһилиэгин сайдыытыгар кылаатын иһин» бэлиэнэн наҕараадаланна. Артемьевтар курдук удьуор үлэһит дьоннор баар буоланнар нэһилиэк үүнэр, сайдар кэскиллээх!