СӨ норуотун маастара, Арассыыйа декоративнай-прикладной искусство худуоһунньуктарын сойууһун чилиэнэ, Амма уонна Болугур нэһилиэктэрин бочуоттаах олохтооҕо Валентина Стручкова — Сарыада Уус ”Уран уус абылаҥа” диэн айар үлэтин быыстапката Амматааҕы Ф.Потапов аатынан норуот айымньытын дьиэтигэр үөрүүлээх быһыыга арылынна.
Валентина Васильевна биһиги өрөспүүбүлүкэбитигэр суос соҕотох баайыыга норуот маастарынан биллэр. Кини илиитин сылааһынан баайыы сап тиһигин дьиктитик дьүөрэлээн 100-тэн тахса үлэлэрдээх, онтон 30-та Олоҥхо тиэмэтигэр буолаллар. Быыстапка арыллар дьоро күнүгэр улуус баһылыгын бастакы солбуйааччы Василий Бураев маастар айар үлэтин үрдүктүк сыаналыырын бэлиэтээн туран, Валентина Васильевнаҕа бу кыһын Санкт-Петербург куоракка „Снежные узоры Якутии“ VI декоративнай-прикладной искусство быыстапкатыгар кытта сылдьан ылбыт Арассыыйа декоративнай прикладной искусство худуоһунньуктарын сойууһун чилиэнин дастабырыанньатын үөрүүлээх быһыыга бар дьон ортотугар туттарда.
Салгыы Амма нэһилиэгин дьаһалтатын аатыттан, бэтэрээннэр сэбиэттэрин бэрэссэдээтэлэ Николай Кириллин,култуура салалтатыттан Ольга Судинова, Ф.Потапов аатынан норуот айымньытын дьиэтин дириэктэрэ Петр Кулаковскай, биир дойдулаахтара, Болугур нэһилиэгин бэрэстэбиитэллэрэ, уран тарбахтаах уустар түмсүүлэрэ, бииргэ үөрэммит, алтыспыт доҕотторо,аймахтара, «Күннүк» түөлбэ олохтоохторо, оҕолоро, сиэннэрэ эҕэрдэ тылларын тиэртилэр.
Амма олохтоохторо Сарыада Уус айан, оҥорон таһаарбыт үлэлэрин сөҕө-махтайа көрдүлэр. Бу хартыыналарга маастар бэйэтин ис эйгэтигэр өр иитиэхтии сылдьыбыт иэйиитин быыстапкаҕа түһэрбит үлэлэрэ эмиэ бааллар.
Олоҥхо уобарастарыттан ураты Таҥара мөссүөннэрэ, авангард тиэмэлэрэ олус сиэдэрэйдик оҥоһуллан тахсыбыттарын киһи сэргии, кэрэхсии көрөр.
“Бу айар үлэм быыстапкатын былырыын үбүлүөйбэр анаан тэрийэргэ быһаарыммытым. Сыл саҕаланыыта Москуба, Санкт Петербург куораттарыгар сылдьан быыстапкаларга кыттан саҕалаабытым. Бүгүҥҥү айар үлэм быыстапкатыгар 45 үлэбин аҕалан туруордум, ону таһынан бастакы үлэлэрбиттэн Олоҥхо тиэмэтигэр баайыллыбыт үлэлэрим турдулар. Таҥара мөссүөннэрин, иконалары эмиэ аҕалан көрдөрүүгэ ыйаатым. Ити “Сикстинская мадонна” диэн улахан үлэбин балтараа сыл кэриҥэ оҥорбутум.
Бу Мадонна омук дойдуларын таҥараларын дьиэлэригэр барытыгар кэриэтэ баар. Ону сэргии көрөммүн, биһиэхэ да бу Мадонна баар буоллун, араҥаччылыы, көрө-истэ сырыттын диэн оҥорорго быһаарыммытым. Кэлэр сылга Олоҥхобут ыһыаҕар улахан быыстапка туруоҕа. Манна бэйэм айар үлэбин Олонхо тиэмэтинэн саҕалаабыт киһи буоларым быһыытынан Былатыан Ойуунускай “Дьулуруйар Ньургун Боотур”диэн олоҥхотунан баайбыт үлэлэрбин өссө кэҥэтэн, ситэрэн биэрэр санаалаахпын”- диэн Сарыада Уус санаатын үллэһиннэ.