Аммабыт улууһугар олохторун чөл олоҕу, физкультураны кытта ситимнээбит дьон аҕыйаҕа суохтар. Кинилэр үлэлэриттэн быыс булан бэйэлэрин эттэрин-сииннэрин эрчийэн чэгиэн-чэбдик сылдьарга, доруобуйаларын тупсарарга күннэтэ дьулуһаллар. Бүгүҥҥү билиһиннэрэр геройбут «Махтал» маҕаһыын салайааччыта, биллэр урбаанньыт Саргылана Тимофеева.
“Оҕолорум улааппыттарыгар наар киэһээ салгын сии тахсыахпын баҕарар этим. 2010 сылтан ыкса ыалбын Архипова Светланалыын скандинавтыы хаамарбытын саҕалаабыппыт. 2017 сылтан дьүөгэбин Вераны өйүү таарыйа уонна бэйэм эмиэ баҕарар буолан фитнестыыр буолбуппут. Икки сыл анараа өттүттэн сүүрэрбин саҕалаабытым. Сүүрүүнү олус астынабын.
Сүүрүү миэхэ медитация курдук. Нэдиэлэҕэ кырата иккитэ тренажернай саалга дьарыктанабын уонна үстэ сүүрэбин. Дьарык кэмигэр биһиги мэйиибит дофамин диэн дьол, дуоһуйуу гормонун таһаарар. Киһи санаата көтөҕүллэр, араас күннээҕи кыһалҕаларга санаарҕаабат буолар. Оттон уонна, тас көрүҥүн тупсар”, — диэн Саргылана Тимофеева туох санааттан олоҕун спорду кытта ситимнээбитин кэпсиир.
Саргылана санаата күүстээх. Инникитин полумарафоҥҥа кыттар баҕалаах. Ол сыалыгар дьулуурдаахтык, кими да эккирэппэккэ, кимниин да куоталаспакка аргыый аҕай эрэллээхтик хардыылаан иһэр.
Саҥа саҕалааччы спортсмен хайы-үйэ сэмэй ситиһиилэрдээх. Былырыын кулун тутар ыйга Дьокуускай куоракка ыытыллыбыт Водоканал кубогар муустаах сүүрүүгэ, бэс ыйыгар Саха АССР 100 сылыгар аналлаах Дьокуускай куорат полумарафонугар уонна күһүн “Лыжне все возрасты покорны” хайыһар күрэхтэһиитигэр кыттан бириистээх миэстэлэргэ тиксибитэ. Олоҕор аан бастакы мэтээллэрин тутар дьолун билбитэ.
“Баҕалаах маска ыттар” диэн саха мындыр өс хоһооно биһиги бүгүҥҥү геройбутугар сөп түбэһэр. Кини спордунан 40 сааһын лаппа ааһан баран утумнаахтык дьарыктанан саҕалаабыта. Аны аҕыйах сылтан бэттэх биир баҕа санаатын толорон, омук тылын баһылыырга сыал-сорук туруорунан анаан-минээн үөрэнэр. Оскуолаҕа төһө да ньиэмэс тылыгар үөрэннэр, дьаныардаах дьарык, эрчиллии түмүгэр Саргылана билигин английскай тылынан холкутук кэпсэтэр, дьыалатын-куолутун дэбигис быһаарсар. Онон “Олоҕуҥ – бэйэҥ илиигэр” диэн этии кырдьыктааҕын Саргылана үтүө холобургар көрөбүт. Киһи сааһыттан тутулуга суох ханнык да кэмҥэ олоҕун уларытар, тупсарар кыахтаах.