Мантан сайын кэрэ айылҕалаах Кыыс Аммабытыгар туристар сынньана кэлиэхтэрэ. Быйыл кинилэргэ анаан федеральнай реестрга киирбит 30 туристическай база, 2 гостиница үлэлиирэ былааннанар. Кэккэ сылларга улууска туризм сайдыытыгар ураты болҕомто ууруллан, Короленко хайатыгар “Амма” рекреационнай кластер тэриллэн үлэҕэ киириэҕэ.
«Сыл аайы туризм хайысхатынан дьарыктаныан баҕалаах урбаанньыттар ахсааннара эбиллэн иһэрэ үөрдэр. Саҥа тутуулар эмиэ арыллан үлэҕэ киирэн иһэллэр. Быйыл “Амма” рекреационнай кластер хайысхатыгар үлэбит күүһүрдэ. Маныаха эдэр ыччакка анааммыт 100 тыһ. солк. Гран олохтооммут «Разработка бренда и дизайн кода” диэн аһаҕас күрэх тэрийбиппит. Бу күрэххэ эдэр дизайнер Владислав Шестаков уонна Юлия Голикова ТРК брендовай логотибын оҥорон бастаабыттара. Бу логотип нөҥүө Амма улууһун сувенирдара, бородууксуйата атыыга тахсыахтара», — диэн Амматааҕы Бизнес инкубатор сүрүн исписэлииһэ Александра Николаева билиһиннэрдэ.
«Билигин тыа сиригэр туризм хайысхата биллэ тупсарын туһугар, дьон сынньанарыгар сөптөөх, аныгылыы усулуобуйа тэриллэригэр үгүс үлэ- хамнас барар. Маны тэҥэ туризм хайысхатынан үлэлиэн баҕалаах дьон араас судаарыстыбаннай бырагырааммаларга, ол эбэтэр социальнай хантараак, Дьарыктаах буолуу Киинин нөҥүө бэйэ дьыалатын тэриннилэр. «Мин биисинэһим» киин нөҥүө субсидия ылыытыгар, турбаза тупсаҕай көстүүтүгэр анаан рекламнай вывескаларга, баннердарга тиийэ үлэлэһэ олоробут. Туризм сайдыытыгар улуус дьаһалтата, бары тэрилтэлэрэ биир сүбэнэн сыаллаах-соруктаах үлэни ыытабыт. Улууспут дьаһалтата быйыл туризмҥа диэн 2 мөл.солк. субсидияны көрдө. Ааспыт сылга Аммабыт улууһугар 40 тыһыынчаттан тахса (организованнай, неорганизованнай) турист кэлэн барбыт эбит буоллаҕына, быйыл өссө элбииллэрин туһугар үлэлэһиэхтээхпит», — диэн «Мин биисинэһим» киин Амма улууһугар салаатын салайааччыта Владимир Колосов кэпсээтэ.
