САХА СИРЭ. Муус устар 20 күнэ — ULUS.MEDIA. Орто Халыма улууһун Бастакы Хаҥалас нэһилиэгэр үлэлиир “Өлөөкө Күөллээҕи сылгы собуота” хааһына тэрилтэтин дириэктэрэ Константин Винокуров байыаннай дьайыыга кытта сылдьар саха боотурдарыгар анаан астаппыт бэртээхэй, иҥэмтиэлээх аһын Дьокуускайга Орджоникидзе аатынан уулусса 10-с №-гэр баар пууҥҥа аҕалан туттарда.
Константин Николаевич кылгастык билиһиннэрбитинэн, хаһаайыстыбата быйыл кыһын идэһэҕэ туттубут сылгытын этиттэн аҕалан, саҥа тэриллэн үлэлээн эрэр “Чоккай Ас” дьоҕус тэрилтэҕэ астата биэрбит. Халыма эмис сылгытын этин бэйэтин симэһинигэр буһарбыттар. Аата даҕаны ол курдук. Аныгы технологиянан астаммыт буолан, арыйдыҥ даҕаны сиигин. Аны дьиктитэ диэн, итиигэ-сылааска даҕаны дьүдэйбэт, икки сылга диэри хаһааныахха сөп.
Онон, сиргэ-уокка илдьэ сылдьарга, бу түбэлтэҕэ байыаннай быһыыга-майгыга даҕаны саамай оноото эбит. Ол эрээри, иирсээн “тушенка” дьүдэйэригэр тиийбэтэр бэрт этэ. “Уолаттарбыт кыайыы-хотуу көтөллөөх этэҥҥэ түргэнник эргиллэн кэлэллэригэр баҕарабын”, – диир Константин Винокуров. Өлөөкө күөллэр кэһиилэрин – 300-түү кыраамнаах 200-чэ сууну пуун үлэһиттэрэ сыа-сым курдук тутан, хортуон холбукаларга хаалаатылар. Халыма сылгытын этиттэн буһарыллыбыт “чуолкай ас” чахчы дьоллоох боотурдарга тиксиэҕэ, күүс-уох эбиэҕэ.
Василий Никифоров