Билиҥҥи кэмҥэ хотугу улуустарга эдэр ыччат, ыаллар ортолоругар ынах-сүөһүнү ииттии сэдэхтик көстөр. Ордук тэҥэ суох усулуобуйалаах хотугу улуустарга сүөһү иитиитинэн эдэр дьон дьарыктана сатаабаттар. Ол да буоллар, биһиги улууспутугар тыа хаһаайыстыбатын күннээҕи түбүгүн, кэккэ ыараххаттары аахсыбакка сүөһүнү, сылгыны иитиинэн дьарыктанар ыаллар аҕыйаҕа суохтар.

Биһиги биир дойдулаахпыт урбаанньыт Августа Старостина кэргэнинээн Иннокентийдыын ынах сүөһүнү ииттэр элбэх оҕолоох эдэр ыаллар. Кинилэр аан бастаан 2012 сыллаахха дьоннорун туйахтарын хатаран биир бургунастан уонна икки саастаах оҕустан саҕалаан сүөһүнү ииттибиттэрэ. Нөҥүө сылыгар сүөһүнү элбэтэр санааттан төрүүр ынахха көрүллэр субсидия харчытынан биир бургунаһы эбии атыыласпыттара. Ол кэнниттэн атыыр оҕустарын бургунаска атастаһан хаһаайыстыбаларын кэҥэппиттэр. Билигин бу эдэр ыаллар номнуо 11 төбө сүөһүлээхтэр. Быйыл төрүөх этэҥҥэ аастаҕына өссө эбиллээри тураллар.

Августа, Иннокентий Старостиннар былырыын тыа хаһаайыстыбатын Граныгар «Саҥа саҕалааччылар» диэн хайысхаҕа киирсэн сатаан грант ылбатахтара. Ол эрэн ынах сүөһүнү тутар эдэр ыал санааларын түһэрбэккэ, быйыл эмиэ граҥҥа киирсээри сылдьаллар.

Августа Старостина бэйэтэ  «Хаарчаана» оҕо уһуйааныгар иитээччи көмөлөһөөччүтүнэн үлэлиир. Кэргэнэ Иннокентий балыыһаҕа сантехниктыыр. Тэрилтэҕэ үлэлиир дьон бириэмэлэрэ ыгым да буоллар, иккиэн бэйэ-бэйэлэрин солбуйсан, бириэмэ булан сүөһүлэрин көрөллөр.

Инники өттүгэр эдэр ыаллар былааннара элбэх. Холобур, тыа хаһаайыстыбатын граныгар киирсэн кыайдахтарына, хаһаайыстыбаларын өссө кэҥэтэр, сүөһүлэрин элбэтэр, усулуобуйаларын тупсарар баҕа санаалаахтар. Биһиги бу эдэр ыал ийэтиттэн Августа Старостинаттан «Ынах сүөһүнү тутуу туох үчүгэйдээҕин» диэн ыйыппыппытыгар маннык эппиэттээтэ: «Билигин уларыйыы-тэлэрийии үксээбит, араас үп-харчы кириисистэрэ буола турар кэмнэригэр, дьыл-хонук өссө хайдах салаллан турара биллибэт. Ол гынан баран, төрүт дьарыгы тутан олорооччулар, сүөһүлээх дьон хаһан баҕарар олохторун уйгутун бэйэлэрэ салайынар кыахтаахтарын өйдүүбүт. Ол иһин, ыарахаттар баалларын да иһин, сүөһүбүтүн тутан олоробут». Августа, Иннокентий Старостиннарга бары былааннарын ситиһэллэригэр, ураты боруода саха ынаҕын үксэтэ туралларыгар баҕарабыт.

Автор: Сардаана Копырина