Амматааҕы ТХПК астыыр-үөллүүр киинин суоппара Спиридон Корнилов тэрилтэ биир киэн туттар үлэһитэ буолар. Кини күн аайы өрөбүлэ суох нэһилиэктэринэн, сайылыктарынан айаннаан үүттэрин таһар.
Амматааҕы ТХПК астыыр-үөллүүр киинин суоппара Спиридон Корнилов күн аайы нэһилиэктэринэн, сайылыктарынан айаннаан ыанньыксыттар үүттэрин икки төгүл төхтүрүйэн туран таһар, Чапчылҕаҥҥа баар астыыр-үөллүр кииннэригэр тириэрдэр. Суоппар күн аайы алтыһар дьоннорунан үүтү тутааччылар Бөтүҥҥэ Туйара Романова, «Дьаам» сайылыгыгар Розалия Непомнящая, «Туора» сайылыгар Марианна Неустроева, «Чолбон» бааһынай хаһаайыстыба салайааччыта Пелагея Иванова, Абаҕа «Дьаамыгар» Лилиана Анисимова, Мээндигигэ Татьяна Яковлева, Соморсуҥҥа Марина Софронова, ону тэҥэ Абаҕа Оһохтооҕун тутааччылара буолаллар. Сайыҥҥы ыйдарга абаҕалар күҥҥэ муҥутаан 2 туонна, бөтүҥнэр 1,3-1,4 туонна, соморсуннар 1 туонна үүтү ыаннар саамай элбэх үүтү ыыталлар. Оттон массыынаҕа биир сырыыга 4 туонна үүт киирэр.
Спиридон Валерьевич В.Г.Короленко аатынан Амма 1№-дээх орто оскуолатын бүтэрэн баран Алтаннааҕы 15 №-дээх ОПТУ-га үөрэнэн суоппар идэтин ылбыта. Ол кэнниттэн дойдутугар ытык иэһин толорон Арассыыйа аармыйатын кэккэтигэр Хабаровскай кыраайга баһаарынай чааска сулууспалаабыта. Төрөөбүт Амматыгар төннөн кэлэн араас үлэлэргэ сылдьыбыта. Билигин дьиэ кэргэн аҕа баһылыга, тэрилтэ киэн туттар үлэһитэ, бастыҥ суоппар Спиридон Корнилов Амматааҕы астыыр-үөллүүр кииҥҥэ алтыс сылын ситиһиилээхтик үлэлиир.
«Үлэм күнэ хас сарсыарда аайы 5 чаастан саҕаланар. Амматтан Бөтүҥ, Абаҕа, Мээндиги, Соморсун суолунан күҥҥэ иккитэ төхтүрүйэн туран ыанньыксыттар ыабыт үүттэрин Чапчылҕаннааҕы кииммитигэр таһабын. Биир да күн өрөөбөккө, көтүппэккэ, сылайары, ыалдьары аахсыбакка бу курдук алтыс сылбын үлэлиибин. Уот бардаҕына тардыллабын, 30-туу ынаҕы ыы сылдьар ыанньыксыттар бүтэллэрин кэтэһэбин. Үүт ыама балаҕан ыйын саҥатыттан аччаан барааччы. Ааспыт күһүн ыксаллаах балаһыанньа үөскээн Сатаҕай, Алтан, Эмис эҥэр икки ый устата үүтү таспытым. Сынньалаҥ диэни билбэт үүтү дэлэтэр үлэһит үтүөкэн дьону кытта алтыһарбыттан астынабын, биир санаанан, сүбэнэн үлэлии-хамсыы сылдьар 90 киһилээх эйэлээх кэлэктииппин сөбүлүүбүн. Төһө да араас ыарахаттар баар буолбуттарын иһин, биһиги дьоммут-сэргэбит остуолугар эт-үүт аһылыга остуолларыгар дэлэй буоларыгар кыһаллабыт», — диэн санаатын үллэстэр Спиридон Корнилов.
