Бу күннэргэ Саха Өрөспүүбүлүкэтин Урбааны сайыннарар пуондатын генеральнай дириэктэрэ Петр Максимов Бүлүү улууһугар сылдьан бэйэ дьыалатын тэрийии туругун, кыһалҕаларын билистэ, урбаанньыттары кытта сирэй көрсөн кэпсэттэ.
Ыам ыйын 24 күнүгэр Саха Өрөспүүбүлүкэтин Урбааны сайыннарар пуондатын генеральнай дириэктэрэ Петр Максимов Бүлүү улууһун урбааны өйүүр пуондатын дириэктэрин Александр Акимовы, улуус дьаһалтатын экономикаҕа отделын сүрүннүүр испэсэлииһин Дмитрий Петрову кытта Лөкөчөөҥҥө бөдөҥ пиэрмэр Афанасий Харлампьев сыыр оҥорор сыаҕар, Дьөккөҥҥө сылгы, ынах ииттэр, сүүрүүк аттары тутар Иван уонна Сидор Ионовтар бааһынай хаһаайыстыбаларыгар сылдьан үлэни-хамнаһы, тыа хаһаайыстыбатынан дьарыктанар урбаанньыттар кыһалҕаларын, инники соруктарын билистэ.
Сарсыҥҥы күнүгэр Петр Максимов Бүлүү куоратыгар евро-түннүктэри оҥорор Иван Егоров сыаҕар, араас иэннээх пластик емкостары оҥорор Дмитрий Татаринов сыаҕар, «Доктор +» медицинскэй клиникаҕа, Кыадаҥдаҕа Айталина Томская кыһыҥҥы тэпилииссэтигэр сырытта, урбаанньыттары кытта ирэ-хоро сэһэргэстэ.
Урбааны сайыннарар пуонда генеральнай дириэктэрэ Петр Максимов Бүлүү куорат урбаанньыттарын кытта көрсөн «Төгүрүк остуол» тула урбаанньыттар уустук кэмҥэ кыһалҕаларын, соруктарын, туох көмө оҥоһулларын кэпсэттилэр.
Түмүккэ, Саха Өрөспүүбүлүкэтин урбааны сайыннарар пуондатын генеральнай дириэктэрэ Петр Максимов уонна Бүлүү улууһун баһылыга Сергей Винокуров бииргэ үлэлииргэ Сөбүлэһии түһэристилэр.