Амма улууһун мүөттээх ыҥырыаны иитээччилэрин Ассоциациятын бэрэссэдээтэлэ Эльвира Пестерева оҥорон таһаарар мүөтүн туһатын туһунан элбэҕи кэпсиир. Эльвира Васильевна этэринэн, мүөт олох буорту буолбат, сөптөөхтүк харайдахха, хас баҕарар сыл туруон сөп.
Эльвира Васильевна сылтан сыл бородууксуйатын көрүҥүн элбэтэн иһэр. Быйыл Болугур нэһилиэгин туойуттан оҥоһуллубут анал иһиккэ мүөтүн атыылаан сэҥээриини ылла. Маннык иһиккэ мүөт хас баҕарар сыл хараллыан сөп, бэйэтин туһалаах өрүттэрин сүтэрбэт. Онтон мүөтэ бүттэҕинэ иһитин салгыы хайа баҕарар туттуохха сөп.
Маны сэргэ сүһүөх ыарыыларыгар, тирии бааһа түргэнник оһоругар туттуллар маас оҥорон эмиэ атыыга таһаарда. Бу мааһы туттубут дьон кини олус көмөлөөҕүн этэллэр. Биир бэйэм эмиэ туттан, бэркэ астына сылдьабын. Маас састааба толору натуральнай. Ол курдук кини састаабыгар мас арыытын кытта бэйэлэрэ өлбүт ыҥырыалар, ыҥырыа буоската киирэллэр. Маны Эльвира Васильевна быһаарбытынан киэһэ утуйаары сытан ыалдьар сирдэргин сотуоххун наада. Аны куртах үлэтин тупсарыыга, иммунитеккын улаатыннарыыга, тымырдаргын, сүрэххин бөҕөргөтүүгэ, куртах бааһын эмтииргэ, араас дьахтар ыарыыларын эмтииргэ туһалаах мүөт суотатын эмиэ таһаарар.
Өссө суотаны ыстаатаххына кариеһы уонна миилэн бааһырыыларын эмтиэххэ сөп эбит.
«Быйыл наһаа кураан итии сайын буолан, ааспыт сыллааҕар аҕыйах мүөтү ыллым. Ааспыт сылга 100 киилэ эбит буоллаҕына, быйыл 70-ча киилэ курдук мүөтү оҥорон таһаардыбыт. Уопсайынан бары да мүөттээх ыҥырыанан дьарыктанааччылар мүөттэрэ аҕыйах диэххэ сөп. Холобура былырыын улуус үрдүнэн 2,5тонна эбит буоллаҕына, быйыл быһа холоон 1 тонна эрэ буолла. Биһиги улууспутугар 19 ыҥырыанан дьарыктанааччы баар», — диэн этэр Эльвира Васильевна.
Амма мүөтэ ураты, Амма мүөтэ саамай минньигэс диэн мээнэҕэ эппэттэр. Бэйэ сиригэр үүммүт үүнээйиттэн оҥоһуллан тахсыбыт мүөт туһата чахчы да күүстээх буоллаҕа. Онон атын сиртэн мүөт ылардааҕар бэйэбит дьоммут киэнин ылан амсайбыт уонна туһаммыт быда-а-ан ордук.