Итинник ааттаах дискуссионнай түһүлгэҕэ оройуоннааҕы дьахтар форумун чэрчитинэн өрөспүүбүлүкэтээҕи дьахталлар XV сийиэстэрин көрсө тэрилтэ салайааччылара, дьарыктаах уонна урбаанынан дьарыктанааччы дьахталлар сирэй көрсөн уонна ЗУМ платформа нөҥүө кытыннылар.
Улуус баһылыгын социальнай боппуруоска солбуйааччы Уларова Анна Михайловна киирии тылынан арыйда:
— Быйыл САССР 100 сылынан Ил Дархан демография сайдыытыгар уонна дьиэ кэргэҥҥэ улахан болҕомтону уурарын тоһоҕолоон, Саха сиригэр Ийэ сылынан биллэрбитэ. Манна олоҕуран «Арассыыйа ийэлэрэ» уопсастыбаннай хамсааһын тэриллибитэ 10 сылыгар, өрөспүүбүлүкэтээҕи дьахталлар XV сийиэстэригэр үс уопсастыбаннай тэрилтэлэр көҕүлээһиннэринэн улууска дьахталлар форумнара ыытыллар.
«Өрөспүүбүлүкэтээҕи дьахталлар XV сийиэстэригэр Ньурбаттан 10, дьаҥ ыарыытынан сибээстээн 250 дэлэгээт кыттыыны ылыахтаах. 11 дискуссионнай былаһаакка улэлиэ. Улуустартан Ньурба, Чурапчы улуустара дискуссионнай былаһааккаҕа кыттыыны ылыахтара», — диэн эттэ.
«Ньурба оройуонугар социальнай өйөбүл миэрэлэрин туһунан» тиэмэҕэ дьаһалта дьиэ кэргэн уонна социальнай боппуруостарга сүрүннүүр исписэлииһэ Евгения Кириллина дискуссия кыттыылаахтарыгар Ньурба оройуонугар дьиэ кэргэннэри социальнай өйөбүл миэрэлэрин:элбэх оҕолоох дьиэ кэргэннэр оҕолоро оптуобуска транспортнай каартанан туһаналларын; «Ньурба дьиэ кэргэнэ» муниципальнай ийэ хапытаала улэлиирин; олох уустуктарыгар тубэспит гражданнар, искэн ыарыылаахтар эмтэнэ баралларыгар материальнай көмө көрүллэрин; капитальнай өрөмүөн, тутуу, олорор дьиэҕэ толору хааччыллыыны киллэриигэ биир кэмнээх аадырыстаах көмө материальнай көмө оҥоһуллалларын билиһиннэрдэ.
«Арассыыйа ийэлэрэ» Ньурбатааҕы отделениетын салайааччыта Саргылана Седалищева «Доруобай ийэ, доруобай оҕо» бырайыагынан Ньурба поликлиникатыгар учуокка турбут оҕо күүтэр ийэлэргэ анаан обменнай каарта, маны таһынан «Мин Ньурбаҕа төрөөбүтүм» оҕоҕо аналлаах бэлэҕи презентациялаата.
«Ньурба дьиэ кэргэнэ» ийэ хапытаалынан туһаммыт Ньурбачаан нэһилиэгин олохтооҕо, 4 оҕо ийэтэ Татьяна Каратаева элбэх оҕолоох дьиэ кэргэҥҥэ ийэ хапытаала өйөбүл буоларынан улуус баһылыгар А.М. Иннокентьевка махтанарын биллэрдэ.
Улуустааҕы социальнай көмүскэл салалтатын салайааччыта И.А. Находкина «Государственная социальная помощь на основе социального контракта» туьунан билиһиннэрдэ.
Цифровой тиэхиньикэни өрөмүөннээһиҥҥэ уонна өҥөнү оҥорууга программист идэлээх ИП Сергеева Н.В. үлэтин хайысхатын билиһиннэрэн видеоролик көрдөрдө. Бастаан бэйэ дьыалатын астарыгар өйөбүл буолбут «Мария» рынок салайааччытыгар Петрова Э.С. махтанарын биллэрдэ. Салгыы Наталья Васильевна бэйэ дьыалатын хаҥатарын туһунан билиһиннэрдэ.
Түмүк нэһилиэгиттэн социальнай хантараагынан бэйэ дьыалатын астан үлэлиир Саввисова Малена Николаевна аан бастаан хобби курдук оҥостон дьиэҕэ барыанньа астыыртан саҕалаабытын, улуустааҕы дьарыктаах буолуу киин нөҥүө өйөбүл ылан, бэйэ дьыалатын астан үлэлиирин кэпсээтэ, дискуссия кыттыылаахтарыгар бэйэтэ астаабыт барыанньатын амсатан биһирэбили ылла.
Александра Сергеевна Иванова социальнай хантараагынан «Кэскил» оҕо саадыгар үлэҕэ киирэн, иитээччи дуоһунаһыгар ситиһиилээхтик үлэлии сылдьарын, сахалыы тыыннаах бөлөх арыйан үлэлэтэрин туһунан сырдатта.
Ньурба улууһунааҕы Дьарыктаах буолуу киинин салайааччыта С.М. Столярова дьахталлары дьарыктааһыҥҥа көмө оҥорууга анаан иһитиннэрии онордо. «Тупс-арт» декор-устуудьуйа салайааччыта ИП Прокопьева Саргылана Николаевна аан бастаан кэргэнинээн үлэлэрин хайдах саҕалаабыттарын, билигин саҥалыы хайысханан килиэйэннэри кытары үлэлэһэллэрин кэпсээтэ. Ньурба оройуоннааҕы «Мой бизнес» киин сэбиэдиссэйэ Елена Валентиновна Романова бэйэ дьыалатын астан үлэлиэн баҕалаахтарга сүбэлэри биэрдэ.
Дискуссия кыттыылаахтара туһааннаах салайааччыларга боппуруос биэрэн сөптөөх хоруйдары ыллылар.
