Муус устар 19 к. Ньурба к. Биисинэс-инкубаторын саалатыгар тыа хаһаайыстыбатын департаменын уонна улуустааҕы Ытык Сүбэ улууска тыа хаһаайыстыбатын сайдыытын боппуруостарын тула кыттыгас сүбэ мунньахтара ыытылынна.
Т/х департаменын исписэлиистэрин уонна Ытык Сүбэ чилиэннэрин кытта сэргэ, мунньахха улуус баһылыгын экэниэмикэҕэ, үпкэ, инвестицияҕа уонна бырайыактары салайыыга солбуйааччыта Н.И.Бурнашев, ТХМ иһинэн Мелиорация управлениетын Ньурбатааҕы филиалын кылаабынай инженерэ И.А.Данилов, бааһынай хаһаайыстыбалар бэрэстэбиитэллэрэ Е.Г.Филиппов (Сүлэ), А.И.Васильев (Дьаархан, маһы таҥастыырынан дьарыктанар урбаанньыт) кытыннылар.
Департамент салайааччыта И.В.Егоров улуус тыатын хаһаайыстыбатын үлэтин-хамнаһын, И.А.Данилов улууска мелиорация үлэтин туһунан сиһилии билиһиннэрдилэр. Соҕотуопка, мелиорация, сири кытта үлэ туһунан уо.д.а. элбэх ыйытыктар киирэн хоруйданнылар. Өр сылларга үтүө суобастаахтык үлэлээн, оройуон сайдыытыгар үгүс көлөһүннэрин тохпут, дьон-сэргэ ытыктабылын ылбыт, билигин даҕаны уопсастыбаннай олоххо көхтөөх кыттыыларынан холобур буола сылдьар ытык кырдьаҕастар С.Г.Петрова, А.С.Захаров, И.И.Николаев, В.Т.Афанасьев, К.В.Васильев, И.Н. Иннокентьев уо. д. а. кэпсэтиигэ актыбыынайдык кытыннылар.
Ханнык салааҕа хайдах быһыылаахтык дьаһанан үлэни-хамнаһы өссө тупсарыахха сөбүн туһунан санааларын этилиннилэр, сүбэ-соргу даҕаны биэрдилэр. Сүбэ мунньах түмүгүнэн маннык кэпсэтиини өссө салгыы ыытарга, тыа хаһаайыстыбатын сайдыытыгар сыһыаннаах этиилэри түмэн бэлэмнииргэ этилиннэ.