Арассыыйа уонна СӨ худуоһунньуктарын Сойууһун чилиэнэ Николай Рязанскай уруһуйдарын быыстапката Санкт Петербург куоракка үөрүүлээхтик арылынна. Биир дойдулаахтара, куорат олохтоохторо талааннаах худуоһунньук хартыыналарын сэҥээрэ көрдүлэр.
Санкт Петербург куорат Арктика уонна Антарктика Арассыыйа судаарыстыбаннай түмэлигэр Сулҕаччы олохтооҕо, айылҕаттан бэриллибит айар куттаах худуоһунньук Николай Рязанскай айан таһаарбыт хартыыналарын быыстапката үөрүүлээхтик арылынна. Быыстапка улуус бастакы кулубата Афанасий Рязанскай төрөөбүтэ 150 сыллаах үбүлүөйүн чэрчитинэн тэрилиннэ. Дьоро күн тэрээһини Арктика уонна Антарктика Арассыыйа судаарыстыбаннай түмэлин дириэктэрин бастакы солбуйааччы Эдуард Суворов салайан ыытта уонна аалай кыһыл лиэнтэни худуоһунньук Николай Рязанскайы кытта быста.
Бэйэлэрин эҕэрдэ тылларын Арассыыйа Президенин иһинэн СӨ Бастайааннай бэрэстэбиитэлистибэтин солбуйааччы Юрий Кравцов, Амма улууһун баһылыгын социальнай боппуруостарга солбуйааччы Нюргуйана Илларионова, биир дойдулаахпыт, А.И. Герцен аатынан РГПУ Хотугу норуоттар институттарын профессора, филологическай билим доктора, Арассыыйа үөрэхтээһинин эйгэтин Бочуоттаах үлэһитэ, Саха сирин наукаларын үтүөлээх деятелэ, Амма улууһун Бочуоттаах олохтооҕо Александр Петров, Санкт Петербург куорат блокадатын түмэлин сотруднига Михаил Кириллин, Соморсун нэһилиэгин дьаһалтатын баһылыгын солбуйааччы Надежда Белолюбская тириэртилэр.
Быыстапка аһыллыбытын кэннэ худуоһунньук хас биирдии хартыынаҕа тохтоон кэлбит дьоҥҥо билиһиннэрбитин, кэлбит дьон бэркэ сэҥээрэ, сөҕө-махтайа көрдүлэр. Барыта 22 үлэ турда. Быыстапка ыам ыйын 16 күнүттэн саҕалаан бэс ыйын 18 күнүгэр диэри туруо.