Ньурба куоратыгар олорор элбэх оҕолоох дьиэ кэргэн Владимир Прокопьевич Степанов кэргэнинээн Мария Ивановналыын бэйэ дьыалатын тэринэн үлэлииллэр.
Бу иннинэ Владимир Прокопьевич Ньурбаҕа 2014 с бэйэтигэр ИП тэринэн, дьоннор ордук туохха наадыйалларын көрө сылдьан күлүүс оҥорооһуҥҥа, кыптыыйы, быһаҕы, сүгэни, устуруус, мууһу буурдуур быһаҕын, бензопила сыабын сытыылыырга дьонтон сакаас ылан үлэтин саҕалаабыта. Кэлин эбии эт эрбиир атыылаһан, күһүнтэн саҕалаан эт эрбэтэр. Дьоппуон тыраахтырынан саас буола фрезалыыр, булуулуктуур, остуолба хайаҕаһын үүттүүр.
Онно эбии ленточнай пилорама, эт эрбиир станок быһахтарын бухтаттан быһан араас кээмэйинэн иһэрдэн (сваркалаан) Бүлүү бөлөх улуустарыгар атыылыыр. Ньурба олохтоохторо сылы төгүрүччү кини оҥорор өҥөлөрүнэн хамаҕатык туһаналлар.
Бэйэ дьыалатын хаҥатар сыалтан ыал аҕата эбии гравировкалыыр лазернай станок атыылаһан, кэргэнэ, Мария Ивановна бэйэ дьарыгын арынан ааспыт сылтан саҥалыы үлэлээн эрэр:
-Дьон үксэ бэлэххэ туттаралларыгар гравировкалаталлар. Ордук уруучукаҕа, быһахха, мэдээллэргэ, брелок, жетон, табличкалара оҥоттороллор. Араас дьон заказтыыр, соҕурууттан кытары ону маны суруттаран ыыттараачылар бааллар,- диэн этэр.
Степановтар дьиэ кэргэннэриттэн инникигэ туох былааннаахтарын туһунан ыйыппыппар, эбии мастарыскыай туттан нэһилиэнньэҕэ наадалаах өҥөлөрү киллэрэр санаалаахтарын туһунан эттилэр.
Элбэх оҕолоох дьиэ кэргэн баҕа санаалара туоларыгар баҕара хаалабын.
Антонина Семенова