Москуба куоракка Бүтүн Арассыыйатааҕы “Предприниматель года -2024” бириэмийэни туттарыы сиэрэ-туома ыытылынна. Манна Арассыыйа араас регионнарыттан бэйэ дьыалатын тэринэн үлэлии-хамсыы сылдьар урбаанньыттар кэллилэр. Кинилэр ортолоругар Наталия Шишигина эмиэ баар. Бу туһунан биһиэхэ Амма улууһун «Мин биисинэһим» киин салаатын салайааччыта Александра Николаева иһитиннэрдэ.
Наталия Ивановна Шишигина Амма нэһилиэгин бочуоттаах олохтооҕо, улуус бочуоттаах мецената, ”За милосердие” , “Гордость Амги” бэлиэ хаһаайыннара. Биисинэһин ситиһиилээхтик салайарын сэргэ өссө уопсастыбаннай үлэнэн дьарыктанар. Ол курдук улууска “Автоледи” кулуубу салайбыта хас да сыл буолла, “Арассыыйа ийэлэрэ” уопсастыбаннай хамсааһын көхтөөх чилиэнэ, “Күөгэйээнэ” дьахталлар ансамбыллар биир кэрэ куоластаах ырыаһыта. Өссө инникитин Сэбиэскэй кэмнээҕи маллары мунньан түмэл оҥорорго үлэлэһэ сылдьар. Наталия Ивановна бэйэтин дьыалатын өссө ыарахан 90-с сыллартан саҕалаан күн бүгүҥҥээҥҥэ диэри ситиһиилээхтик үлэлии олорор. Москуба куоракка Амма улууһун биир бастыҥ урбаанньыта Бүтүн Арассыыйатааҕы бириэмийэ “Женское предпринимательство” номинацияҕа лауреат үрдүк аатын ылбытынан истиҥник эҕэрдэлиибит!