Саха тылын чөлүгэр түһэрии, оҕону сахалыы саҥардыы, ол толкуйу бэйэтигэр тиэрдии суолларын тобулары Нам улууһун урбаанньыта Оксана Васильева ыра санаа ымыыта оҥостубута ыраатта. Өрөспүүбүлүкэтээҕи лицей-интернат оҕолоро учууталларын кытта төрөөбүт тылы сайыннарыы боппуруостарын тула сүбэ мунньахтарын куйаар ситимигэр көрөн баран, оҕо оҕоҕо дьайыыта, үөрэтиитэ ордук иҥэмтиэлээх буолууһу, сахалыы тыыннаах, тобуллаҕас толкуйдаах ыччаты кытта үүнэр көлүөнэни көрүһүннэриэххэ наада эбит диэн сорук туруоруммута. Бу сыалтан өрөспүүбүлүкэтээҕи лицей-интернат директорын Иван Шамаевы кытта көҕүлээн сонун тэрээһини былырыын бастакытын ыыппыттара. Санатан эттэххэ, тэрийээччилэр РЛИ, Хамаҕатта саха-французскай лицейин, Аппааны, Нам 1-кы оскуолаларын оҕолорун түмэн улуустааҕы библиотекаҕа «Ийэ тыл кэскилэ» түмсүү салайааччыта Вилюяна Никитина кыттыылаах төгүрүк остуолу 4 былаһаакканан үлэлэппиттэрэ.

Быйыл бэс ыйын саҕаланыытыгар Өрөспүүбүлүкэтээҕи лицей-интернакка киин улуустар оҕолоро «Төрүт тыл түмэр түһүлгэтэ» диэн сүлүөккэ тоҕуорустулар. Урбаанньыт Оксана Васильева Партизан, Нам 1-кы оскуолаларын, Хамаҕатта саха-французскай лицейин үөрэнээччилэрин кытыннарда. Ыҥырыылаах ыалдьытынан урбаанньыт, «Күнтэгил» оҕо уһуйаанын ситимин, «Сахат» чааһынай оскуолатын төрүттээччитэ Анатолий Бурнашев кыттыыны ылла. Бу икки күннээх сүлүөккэ оҕолор олус астына сырыттылар, төрөөбүт тылларынан тото кэпсэтэн чугастык бодорустулар уонна доҕордостулар.

Төрөөбүт тылы үйэтитии сүлүөтэ өрөспүүбүлүкэ олохтоохторун биһирэбилин ылан бу сылга Бүлүү бөлөх, Хаҥалас, Томпо, Мэҥэ-Хаҥалас улуустарыгар көхтөөхтүк ыытылынна. «Бу тэрээһин кыраттан саҕалаан республиканскай таһымҥа тиийэ кэҥээбитэ сыалым-соругум, биир баҕа санаам туолуута дии саныыбын уонна онтон олус үөрэбин», – диэн урбаанньыт Оксана Васильева үөрүүтүн үллэһиннэ.

Үлэ сылыгар «Мин урбааным» киин өрөспүүбүлүкэ экономикатын сайдыытыгар бэйэ кылааттаах урбаанньыттар үлэлэрин-хамнастарын туһунан сырдатар. Биһиги урбаанньыттарбыт туруу үлэһиттэр буолалларын уопсастыба сыаналыыр уонна биһириир.

«Дьоҕус уонна орто урбаан» национальнай бырайыак (Национальный проект «Малое и среднее предпринимательство») чэрчитинэн «Мин урбааным» киин нөҥүө урбаанньыттарга киэҥ хабааннаах араас өҥө көрүллэр. Бу туһунан ыйыллыбыт сигэнэн киирэн ааҕыахха сөп — Мойбизнес14.рф       

ГАУ РС(Я) «Центр «Мой бизнес»