Бу туһунан СР экологиятын министерствотын пресс-сулууспата иһитиннэрэр. 2021 сылтан Аппааныга ойуур питомнига үлэлиир, манна 500 тыһ. бэс мас олордуллубут. Бу 230-250 га ойууру чөлүгэр түһэриигэ сөп буолар.
Атырдьах ыйын 5 күнүгэр СР экологиятын министрин солбуйааччыта Андрей Коноплев питомникка сылдьыбыт. Республикаҕа соҕотох төгүрүк сыл үлэлиир лесопитомник бырайыагын «Рекавери групп» ХЭТ олоххо киллэрбит. Мастары оттуллар, автоматическай уу кутар тэрилинэн, фитолампанан хааччыллыбыт улахан теплицаҕа үүннэрэллэр. «Рекавери групп» ХЭТ генеральнай директора Сергей Янков этэринэн, маһы олордуу хаамыыта — олус ыарахан, уһун уонна элбэх сыралаах үлэни эрэйэр. «Бастакы сылбытыгар теплицабыт мас оһоҕунан оттуллара, тымныы этэ, уот суоҕа, сырдык тиийиитэ үс төгүл кыра этэ. Ол иһин олордубут маспытын барытын сүтэрбиппит. Билигин теплица гааһынан оттуллар. Уу кутуллар ситимэ үлэлиир, 4 резервуартан биэстии куб уу кутуллар. Кэлэр сылга теплицабытын улаатыннарар былааннаахпыт».
Питомникка 4 киһи үлэлиир: агроном, агроном көмөлөһөөччүтэ уонна харабыллар. Сайыҥҥы кэмҥэ Нам улууһун үөрэҕин тэрилтэлэриттэн устудьуоннары сыһыараллар.
Бу саас лесопитомник үлэһиттэрэ Үөдэйгэ икки хонууга кыра мастары олордубуттар. Манна кинилэргэ ойууру сөргүтэргэ анаан учаастактар бэриллибиттэр. Үлэ түмүгэ көрдөрбүтүнэн, үүнүү 95 % буолбут.
«Бу учаастактарга ойууру чөлүгэр түһэрии үлэтэ табылынна диэн этиэхпитин сөп. Биһиги сыалбыт — тастан кыахтары туһаммакка, толору бэйэбит оҥорон таһаарыыбытыгар тахсыы», — диэбит Сергей Янков.
Билиҥҥитэ Саха сиригэр икки ойуур питомнига үлэлиир. Онтон биирдэстэрэ Аппааныга баар, иккис — Өлүөхүмэҕэ Солянка сэлиэнньэтигэр Арктическай государственнай агротехнологическай университет (АГАТУ) бырайыага.
Санаттахха, тохсунньу 1 күнүн 2019 сылыттан ойууру сөргүтэр туһунан федеральнай сокуон олоххо киирбитэ. Сокуон ис хоһооно этэринэн, сир баайын, ойууру туһанааччылар, тутууга анаан маһы кэрдээччилэр уо.д.а. бэйэлэрин суоттарынан үс сыл иһигэр кэрдибит мастарын толору иэнин олордуохтаахтар.