Бэс ыйын ортотугар күүтүүлээх ардахпыт бэрт кыратык сири-уоту ньүөлсүттэ. Нам улууһугар сүөһү аһылыга буолар үүнээйилэри олордууну аахсыбатахха, ыһыы үлэтэ, сүнньүнэн, түмүктэннэ.
Сүөһү аһылыга буолар үүнээйи 1461 гааҕа ыһылынна. Нам улууһугар ыһыы бу көрүҥүнэн 26 хаһаайыстыба дьарыгырар. Хортуоппуй 494,5 гааҕа олордулунна (100%). Былырыыҥҥыны ылан көрдөххө, 436 гааҕа ыһыллыбыт эбит. Оҕуруот аһын 108 гааҕа ыһыахтаахпытын, 105,5 гаа иэннээх сиргэ олортубут. Ол иһигэр: хаппыыста 28, моркуоп 29, сүбүөкүлэ 44,5, араас оҕуруот аһа 4 гааҕа олордулунна. Ыһыы кэмигэр күн-дьыл туран биэрдэ, хата, хаһыҥнаабата.
Ыһыы үлэтэ түмүктэннэ, аны эппиэттээх иккис үлэ кэмэ саҕаланна. Мантан сайын хаһаайыстыбалар үүнээйини көрүү-истии агротехнологическэй ирдэбиллэрин кытаанахтык тутуһан үлэлээтэхтэринэ, өлгөм үүнүүнү ылыахтара, тохпут көмүс көлөһүннэрин тилиннэриэхтэрэ диэн эрэнэбит.
Источник: Районные газеты Якутии