Новости "Центра "Мой бизнес"
Нам улууһугар «Көмүлүөк» хампаанньа сэргэх тэрээһинэ буолла
2 июня 2022

Намнааҕы урбаанньыттары өйүүр «Мин бизнеһым» тэрилтэ салайааччытын Марфа Семеновна көҕүлээһининэн, ыам ыйын 31 күнүгэр Нам нэһилиэгэр Афанасий Шестаков аатынан «Норуот айымньытын киинигэр» «Көмүлүөк» хампаанньа салайааччыта, «Сделано в Якутии» ассоциация председателя, сахалыы остуол оонньуутун федерациятын Президенэ Ольга Григорьева кыттыылаах үгүс тэрээһин ыытылынна.

Республикаҕа урбаан сайдыытын, бэйэ оҥорон таһаарар тэрилтэлэр оҥоһуктарын бренд көмөтүнэн көмүскээһин уратыларын туһунан уонна республикаҕа сахалыы остуол оонньуутун сайдыытын тула сэһэргэһии үгүс дьон сэҥээриитин ылла.

Нам улууһун депутаттарын салайааччыта Алексей Иванович Винокуров уонна Нам нэһилиэгин баһылыгын солбуйааччы Тимофей Егорович Охлопков кыттыыны ыллылар, бу хайысхаларга туох үлэ ыытылларын иһитиннэрдилэр, сүбэ-ама биэрдилэр.

Ону таһынан, Улуу Кыайыы күнүгэр ыытыллыбыт ветераннарга республиканскай турнирга Нам улууһуттан 6 ветеран кыттан Чемпион буолбут грамоталарын уонна мэтээллэрин Егор Петровка, Ольга Ядрихинскаяҕа, Марина Спиридоноваҕа, призерга Мария Лукиноваҕа үөрүүлээх-быһыыга майгыга туттарылынна.

Спорт маастара, тренер, судьуйа Надежда Троева уонна Нам улууһун федерацията тэрээһин кыттыылахтарыгар мастер кылаас көрдөрдүлэр, сүбэ-ама биэрдилэр.

Түмүккэ, Нам улууһун дьоно-сэргэтэ сахалыы остуол оонньуутун федерациятын аатыттан Ольга Григорьевнага өбүгэ оонньуута сайдарын туһугар туһааннаах үлэни ыыта сылдьарын, өйүүллэрин уонна биһирииллэрин биллэрдилэр.

Тэрээһин иккис чааһыгар Нам улууһун урбаанньыт кэрэ аҥаардарын кытта атах тэпсэн олорон «Дьиэ-кэргэн- Бизнес — Дьоллоох олох» уонна «Өбүгэ үгэһин утумнааһын» тула сэргэһии буолла. Бу кэпсэтиини сүрүннээн ыытта Нам улууһун дьаһалтатын баһылыгын солбуйааччы Мария Семеновна Игнатьева.

Ону сэргэ бу тэрээһиҥҥэ «Көмүлүөк» хампаанньа уонна СПОК «Тирэх» тэрилтэ оҥорон таһаарар оноһуктарын, бородукксуйаларын атыыта тэриллэн дьон сэҥээриитин ыллылар.

Кэпсэтиигэ кыттыбыт далбар хотуттар сүрдээх сэргэх, туһалаах тэрээһин буолбутун бэлиэтээн махтаннылар. Уонна маннык ураты туһалаах түһүлгэни хас улуус аайы ыытыллара буоллар диэн баҕа санааларын эттилэр.

Хас биирдии дьиэ-кэргэҥҥэ уйгулаах-быйаҥнаах олох түстэнэрин туһугар бары үтүө санаабытын, күүспүтүн холбуоххайыҥ.

Саха республикатын «Мой бизнес» киин Намнааҕы салаата