Улуус дьаһалтатын аактабай саалатыгар урбаанньаттары кытта көрсүһүү буолла. Төгүрүк остуолга улуус баһылыга Юрий Слепцов, улуус баһылыгын солбуйааччы Филипп Николаев, Намнааҕы бизнес-инкубатор салайааччыта Андрей Бочкарев, «Мин бизнеһим» киин Намнааҕы салаатын салайааччыта Марфа Тарабукина уонна улуус урбаанньыттара утарыта көрсөн олорон, Нам улууһугар урбаан уонна туризм сайдыытын тула аһаҕас киэҥ кэпсэтиини ыыттылар. Улууска урбааны сайыннарыыга туох ситиһии эбэтэр кыһалҕа баарын туһунан хардарыта туһалаах санаа атастаһыыта буолла.

Улууска ханнык хайысханан бэйэбит кыахпытынан элбэх үлэ миэстэтин таһаарабыт, оҥоһуллар өҥөлөр хаачыстыбаларын тупсарабыт, сайыннарабыт, олохтоох бородууксуйаны оҥорон таһаарыыны элбэтэбит уонна батарабыт, туристар интэриэстэрин хайдах тардабыт диэн кэскиллээх кэпсэтиилэр таҕыстылар.

Маннык хардарыта туһалаах санаа атастаһыыта инники үлэҕэ, үлэни-хамнаһы сүрүннүүргэ, баар кыһалҕалары нэһилиэк, улуус, Правительство таһымыгар таһааран быһаарыыга улахан төһүү күүс буолар.

Ону таһынан, граннарга киирсии, бизнес-бырайыактары оҥоруу, нолуок тула олус туһалаах кэпсэтиилэр буолан аастылар.

Төгүрүк остуолга барыта 62 урбаанньыт көхтөөх кыттыыны ылла, олортон 10-на куйаар ситимин нөҥүө.

Улуус баһылыга Юрий Иннокентьевич кыра уонна орто бизнес бары эйгэтэ сайдыытыгар тус-туһунан туһааннаах программалар оҥоһуллалларын сорудахтаата уонна олунньуттан саҕалаан чопчу хайысхаларынан көрсүһүүнү былаанныыры эттэ.

«Нам улууһа» МТ пресс-сулууспата