2025 сыл алтынньы 31 күнүттэн сэтинньи 3 күнүгэр диэри Москва куоракка ыытыллар норуоттар икки ардыларынааҕы «Клинок» ураты уус-уран дьүһүйүүнү тарҕатар айар быыстапка буолла. Быыстапкаҕа Саха сирин уустара былыргы ньымалары, үгэстэри туһанан, дьикти оҥоһуктары билиһиннэрдилэр.
Манна Саха сириттэн Амма, Үөһээ Бүлүү, Мэҥэ Хаҥалас, Нам, Хаҥалас, Дьокуускай куораттан тимир уустара ситиһиилээхтик кытыннылар. Үс күн Нам, Амма, Хаҥалас тимир рудаата уһаарыллан холбоон 15 киилэ болгуо ыллылар. Нам улууһуттан СР норуотун маастардара Руслан Захаров, Михаил Баишев, Александр Михайлов кытыннылар. Михаил Баишев «Төрүт быһах» номинацияҕа бастакы миэстэни ылары ситистэ.
Уопсай уһаарыыга Саха сириттэн 11 киһи үлэлээтэ. Кэлбит ыалдьыттарга, уһаарыыны, быыстапканы сэргээччилэргэ чыыр балык астаан күндүлээтилэр. Уһаарыы бириэмэтигэр туой иһиккэ күөс күөстээн, алаадьы буһаран күндүлээтилэр. Уһаарыллыбыт болгуоттан атын дойду уустарыгар сүгэ оҕустардылар.
«Клинок» быыстапкаҕа кыттан төрүт үгэспитин билиһиннэрэн, Аан дойду ырыынагар тахсыыны бөҕөргөтөргө, саҥа дьыалабыай сибээстэри олохтуурга инникилээх. Быйыл тимир уустара Саха сирин култууратын үрдүк таһымҥа көрдөрөн, атын дойду дьонун кэрэхсибилин, сэҥээриитин ыллылар.
Матрена Платонова, улуустааҕы культура уонна духуобунай сайдыы управлениетын специалиһа