Монголия Улан Баторыгар 2025 сыл бастакы аҥаарыгар “MAZAALAI 2025” диэн аан дойдутааҕы муустан оҥоһукка фестиваль ыытыллыбыта. Манна Нам улууһуттан Иван Румянцев, Роман Петров кыттыыны ылбыттара.
“Монголияҕа аан дойдутааҕы фестиваль 2-с төгүлүн ыытыллар. Фестиваль аата этэрин курдук, Монголия кыһыл кинигэтигэр киирэр “мазаалай” диэн ааттанар гобийскай хагдаҥ эһэҕэ анаммыт кэрэхсэбиллээх тэрээһин”, – диир тимир ууһа Иван Румянцев.
“MAZAALAI 2025” фестивальга тас дойду 10 хамаандатыттан 28 уус кыттыыны ылбыт. Ол курдук, Россия, Кытай, Малайзия, Чехия, Польша, Америка, Корея, Мексика бастыҥнара кэрэхсэбиллээх сирдэри муус оҥоһуктарга чочуйан үрдүк сыанабылга көрдөрбүттэр. Аан дойду күрэхтэһиитигэр Монголия 4 хамаанданы туруорбут. Кэлиҥҥи бириэмэҕэ Монголия уустара үрдүк таһымнаах күрэхтэһиилэргэ бириистээх миэстэттэн түспэт буолбуттара – маастарыстыбалара үрдээбитин туоһута.
Мууһу эрбэтэн оҥоһугу ымпыгар-чымпыгар тиийэ ураннаан, кыһыйан таһаарыы сыралаах үлэ. Күрэхтэһиигэ чочуйар айымньыҥ Монголия кэрэхсэбиллээх сирдэригэр туһуланыахтааҕын урбаанньыт Иван Румянцев этэр. Нам улууһун тимир уустара “Монгольский путешественник” диэн айымньыны оҥорон таһаарбыттар.
16 сыл устата үгүс күрэхтэһиилэргэ өйдөрүн-санааларын холбообут, элбэх сиргэ-дойдуга үлэлэрэ сыаналаммыт, кыайыы көтөллөммүт урбаанньыттар Иван Румянцев уонна Роман Петров сырыылара манан бүппэт. Кинилэр чопчулуулларынан, бастыҥнар мустар түһүлгэлэрэ Кытайга буолар эбит. Кытай курдук улахан сиртэн мээнэ киһи кыайыыны-хотууну аҕалбат. Биһиги айылҕалаах уустарбыт Кытайга бириистээх миэстэни барытын ситиспиттэр – 1-кы, 2-с, 3-с үрдэллэри.
Маны ааһан, 2009 сыллаахтан күрэхтэһэн саҕалаабыт уустар Россияҕа кыһынын “Легенды Севера”, сайынын “Праздник Топора” улахан күрэхтэргэ бараллар эбит. Холобура, “Праздник Топора” күрэхтэһиигэ кыттааччыга 6 м уһуннаах, 1 м кэтиттээх мас биэрбиттэрин, маастар нэдиэлэ устата ойуулуур-мандардыыр соруктанар. Бу күрэхтэһиигэ, 16 бастыҥ маастары талар «сүгэ бырааһынньыгар» биир дойдулаахтарбыт 5-тэ, 6-та кыттыбыттар, кыайыылаахтарынан тахсыбыттар.