Бараан түүтүнэн хатайдааһын ньыматынан (валяние) дьарыктанар норуоттар икки ардыларынааҕы кылаастаах фелтмейкер маастар Людмила Егорова бэйэтин иллэҥ кэмигэр дьарыгын 2019 сылтан саҕалаабыта. Билигин номнуо идэ оҥостон, нэһилиэнньэттэн сакааска үлэлиир.
Хатайдааһын ньыматын ымпыгын-чымпыгын билбит, албастарын сатаабыт, бэйэтэ кистэлэҥ ньымалаах маастар ситиһиитэ да үгүс. Онтон сүрүннэринэн, Санкт-Петербург куоракка ыытыллыбыт арт-войлок норуоттар икки ардыларынааҕы быыстапка дипломана, Москва куоракка буолбут «Войлочное вдохновение-2020» быыстапка күрэх кыайыылааҕа буолбутун бэлиэтиэххэ сөп.
Бэйэ дьарыгынан дохуот киллэринэр самозанятай дьоҥҥо анаан, улуустааҕы «Мин бизнеһим» киин өйөбүлүнэн хатайдааһын ньыматынан таҥас-сап, киэргэл-симэх оҥорор маастар-кылааска 20 киһи сырытта. Умсугуйан туран дьарыктаммыт ыал ийэлэрэ, эбээлэрэ хас биирдии бэйэлэригэр сахалыы стиллээх, аныгылыы көрүҥнээх симэҕи оҥоһуннулар. Күннээҕи да таҥаһы тупсаҕай гына көрдөрөр симэх оҥостубут кэрэ аҥаардар маннык маастар-кылааска өссө да сылдьар баҕалаахтарын биллэрдилэр.
Торт астаан дохуот киллэринэр эдэр ийэ Зоя Васильева:
«Иллэҥ кэммэр үөрэхтээһин буолбутугар үөрэ-көтө кэллим. Маннык маастар кылаас тэрийбит «Мин бизнеһим» киин салайааччытыгар Екатерина Васильевна Николаеваҕа уонна маастарбытыгар Людмила Егороваҕа махталбын биллэрэбин. Бу киин баар буолан, самозанятайдар, биһиги, тэрилтэлээх, өйөбүллээх курдук сананабыт.»
Үөһээ Бүлүүтээҕи «Мин бизнеһим» киин салайааччыта Екатерина Николаева:
— «Маннык хабааннаах үөрэхтээһиннэр биһиги тэрилтэбит нөҥүө тиһигин быспакка ыытылла тураллар. Самозанятайдар өссө сайынныннар, бизнестэрэ өрө күүрүүлээхтик таҕыстын диэн ааттаах-суоллаах спикердэри, талааннаах дьону булан маннык үөрэхтээһиннэри тэрийэбит. Маастар-кылаастар төлөбүрдээхтэр, ону биһиги кииммит барытын толору уйунар. Ас астааһыныгар, таҥас тигиитигэр тиийэ, ханнык дьарык наадалаах диэбиттэринэн көрөн тэриллэр. Холобур, тыҥырах оҥоруутун маастар-кылааһыгар эмиэ 20-чэ кыыс үөрэммитэ. Ол иннигэр «Юридические аспекты самозанятых» диэн докумуон, үп-харчы отчуотун үлэтигэр сыһыаннаах үөрэхтээһин буолан ааспыта. Маннык тэрээһиннэр сылын аайы ыытыллаллар. Кэлэр сылга ханнык көрүҥнээх үөрэхтээһиннэри ыытарбытын сыл инниттэн толкуйдуубут. Самозанятайдары кытары быһаччы кэпсэтии кэнниттэн, туох итэҕэһин, тиийбэтин, туохха ордук наадыйалларын истэн-билэн былаанныыбыт. Хайа баҕарар үлэлээх, үлэтэ суох киһи, муниципальнай уонна государственнай сулууспалаах үлэһиттэртэн ураты, самозанятай буолуон сөп. Ким туохха талааннааҕынан, дьоҕурдааҕынан, сүрэх иэйиитэ ханна сытарынан көрөн, эбии дохуот оҥостуон баҕалаахтар самозанятай буолар кыахтаахтар. Самозанятайдарга билигин олус улахан болҥомто ууруллар буолла. Ол курдук, дохуоттарыттан көрөн, 4%-наах кредитинэн туһаныахтарын сөп, маныаха үгүс бааннар үлэлэһэ олороллор. Кэлэр нэдиэлэҕэ, сэтинньи 10 күнүгэр французскай кухня аһын астыырга үөрэтэр маастар-кылаас буолара былааннанар. Александра Ноговицына тэрийэн ыытыаҕа. Манна эмиэ самозанятайдар сайаапка быһыытынан үөрэниэхтэрэ».
