Дьаархаҥҥа Альберт Иванович Васильев бырааттарын кытта бааһынай хаһаайыстыбатын тэринэн үлэлээбитэ ыраатта. Үлэтигэр мэлдьи саҥаны толкуйдаан олоххо киллэрэр элбэх идиэйэлээх, хоһуун үлэһит быһыытынан биллэр. Ааспыт нэдиэлэҕэ улуус бааһынай хаһаайыстыбаларыттан бастакынан саҥа буойуна сыаҕын тутан үлэҕэ киллэрдэ.
«Эккэ техническэй регламент киирбитинэн сибээстээн хас да сыл устата былааннаан сылдьыбыппын олоххо киллэрдим, — диир Альберт Васильев. — От үлэтин иннинэ бырааппын Алексейы уонна күтүөппүн Диманы кытта буойуна дьиэтин каркаһын туппуппут. Онтон ыла барытын ити курдук ситэрэн, үлэбит быыһыгар туттубут.
Барытын бэйэбит үппүтүнэн оҥордубут. Барыта бэлэм оборудование атыылаһар сыаналаах диэн, ороскуоппутун кыччатар сыалтан сороҕун бэйэм толкуйдаан оҥордум. Буойуна иһигэр сүөһү хаайар хаачыка курдук сыбааркалаан оҥоһулунна. Сүөһүнү илиинэн охторобут, лебедканан ылан үөһэ ыйаан таһаарабыт, иккис лебедканан тириитин хастыы тартарабыт. Буойунаҕа тымнытар хостоохпут, онно илдьэн ыйаан баран астыыбыт. Бэтэринээрдэр кэлэн көрөн баран сөп диэбиттэрэ, көҥүл биэрбиттэрэ. Ааспыкка боруобалаан биир сүөһүнү өлөрбүппүт. Күҥҥэ 2-4 сүөһүнү өлөрүөхпүтүн сөп. Таһырдьа өлөрөрдөөҕөр бытаан курдук эрээри, дьиэ иһигэр сылааска үлэлииргэ үчүгэй, итиэннэ сүрүнэ — ветеринарнай ирдэбилгэ толору эппиэттиир, ыраас буолар.
Дьоҥҥо биллэрии ыыта иликпит, онон улаханнык билбэттэр. Уолаттарбын кытта сүбэлэһэн баран, бастакы кэлбит хаһаайыстыба биир сүөһүтүн босхо өлөрөргө диэн быһаарбыппыт. Сыанабыт биир сүөһүнү өлөрүүгэ — 4500 солк. Сүөһүлээх киһи биһиэхэ сүөһүтүн аҕалан биэрэр уонна бэлэм чиэппэрдэммит эти, сууллубут иһи ылар. Барыта, эппитим курдук, ирдэбилгэ эппиэттиир буолар. Килийиэн баҕатынан этин эрбээн кырбастаан биэриэхпитин сөп. Маннык буойунаҕа өлөрүллүбүт эти хаһаайын ханна баҕарар атыылыыр бырааптаах, ветеринарнай арыаллыыр докумуону ылар. Сибидьиэнньэни аналлаах «Меркурий» бырагыраамаҕа киллэрэбит.
Хаһаайыстыба туһунан кэпсиир буоллахха, дэриэбинэ таһыгар 9 гаа сирдээхпит. СӨ тыатын хаһаайыстыбатын министиэристибэтин «Дьиэ кэргэн фермата» куонкуруһугар кыайан 4,2 мөл. солк. суумалаах Грант ылан, 2017 с. ахсынньыга 80 миэстэлээх хотон тутан киллэрбиппит. Урут сүөһүбүтүн аҕыйатан испиппит. Кэлин бааһынайы өйүүр үчүгэй судаарыстыбаннай бырагыраамалар баар буолбуттарыгар, бырааттарбын кытта тыа хаһаайыстыбатыгар кэскиллээхтик, үчүгэйдик тэринэн үлэлииргэ сүбэлэспиппит. Сүөһүбүт иитиитигэр иккис тыыны киллэрэн үлэлии-хамсыы сылдьабыт. Билигин 80-ча сүөһүлээхпит, онтон 20-тэн тахсата ынах. 40-ча сылгылаахпыт. Сылын аайы 20-чэ сүөһүнү туттабыт.
60-ча гаа ходуһалаахпыт. Эрдэ сир оҥоһуутунан дьарыктаммыт буолан, быйылгы кураан сайыны билбэтибит диэххэ сөп. Кыстыыр оппутун булбуппут, өссө аҕыйах оту атыылаатыбыт.
Сүөһүбүт ахсаана кыралаан эбиллэ турар. Сылгыбыт ахсаанын эмиэ элбэтэбит. Убаһалартан сороҕун иитэ хааллартыахпыт».
Бааһынай хаһаайыстыба үлэтин-хамнаһын былырыыҥҥыттан быраата Алексей Иванович иилээн-саҕалаан салайар. Васильевтар Дьаархаҥҥа туттубут базаларын көрөн киһи эрэ астынар. 80 сүөһүгэ аналлаах хотонноро, чахчы даҕаны, холобур буолар хотон, хааччыллыыта даҕаны ситэри-хотору. Москваҕа сакаастанан ылыллыбыт 4 ыыр аппарат, вакуум, автопоилка эҥин барыта баар. 3 кубометрдаах цистерналаахтар, носуостаах. Дьон үлэлиир-сынньанар усулуобуйата толору тэриллибит.
Эмиэ манна үлэһиттэргэ аналлаах 2 кыбартыыралаах дьиэни туппуттара. Билигин манна Альберт Иванович бииргэ төрөөбүт улахан эдьиийин кыыһа Алена кэргэнин Дмитрийы кытта Намтан көһөн кэлэн олохсуйдулар. Эрдэ эмиэ хаһаайыстыбалаах олорбут буолан, үлэлээбит аҕай үлэлэрин илиилэригэр эрэллээхтик туттулар.
Альберт Васильев бэйэтэ мас матырыйаалын оҥорор урбаанньыт быһыытынан эмиэ үлэлиир. 2013 с. ИП тэринэн маһы эрбэтиинэн дьарыктанар. «Logocol Laks 500» Швеция оҥоһуга пилорамалаах. Аналлаах мастарыскыай дьиэлээхтэр. 2 «Беларусь» тырааахтырдаахтар. Дэлээнэ ылан мас кэрдэн киллэрэн дьон тугу сакаастыырынан: хаптаһыны, бурууһу, лафеты, полусфераны, евровагонканы, наличнигы уо.д.а бэлэмнээн таһаараллар. Эрбии көөбүлэ да таах хаалбат. Инньэ гынан тобоҕо суох бородууксуйа оҥоһуллан тахсар. Хотон уонна мас үлэтигэр бырааттыылар Альберт уонна Алексей Васильевтар, күтүөттэрэ Дмитрий буолан үлэлииллэр. Хотон үлэтигэр Алена көмөлөһөр.
«Бу курдук сылы эргиччи, күн бокуойа суох үлэлиибит. Хаһан баҕарар үлэлиир киһи бэйэтигэр эрэллээхтик олоҕун уйгутун оҥостор», — диир Альберт Иванович.